قازاقستاندا بازالىق زەينەتاقى مولشەرى ارتادى جانە ىنتىماقتى زەينەتاقىنى ەسەپتەۋ ءۇشىن ەڭ جوعارى تابىس كولەمى وسەدى. بۇل تۋرالى قر ەڭبەك جانە حالىقتى الەۋمەتتىك قورعاۋ مينيسترلىگىنىڭ رەسمي سايتىندا جاريالاندى.

جاقىندا مەملەكەت باسشىسى قازاقستان حالقىنا جولداۋىندا ەڭ تومەنگى جالاقى مولشەرىن ارتتىرۋ جانە زەينەتاقى جۇيەسىن قايتا قاراۋ تۋرالى ايتتى. پرەزيدەنتتىڭ ايتۋىنشا، ەڭ تومەنگى بازالىق زەينەتاقى مولشەرلەمەسىن ەڭ تومەنگى كۇنكورىس دەڭگەيىنىڭ 70% — ىنا دەيىن، ال ەڭ جوعارى مولشەرلەمەنى 120% - عا دەيىن جەتكىزۋ كەرەك. بۇل بۇعان دەيىن قابىلدانعان شەشىمدەرمەن بىرگە 2025 جىلعا قاراي جيىنتىق زەينەتاقىنى ورتا ەسەپپەن 27% - عا ۇلعايتۋعا مۇمكىندىك بەرەدى.

وسىعان بايلانىستى ەڭبەك مينيسترلىگى قازاقستاندا بازالىق جانە ورتاق زەينەتاقىنى، سونداي-اق جۇمىسكەردىڭ زەينەتاقى جيناقتارى ەسەبىنەن قالىپتاساتىن بجزق-دان تولەنەتىن زەينەتاقى تولەمىن قامتيتىن كوپ دەڭگەيلى زەينەتاقى جۇيەسى جۇمىس ىستەيتىنىن ەسكە سالدى.

بۇل رەتتە ىنتىماقتى زەينەتاقى جۇيەسى بىرتىندەپ قىسقارۋدا، ويتكەنى ولاردى تاعايىنداۋ كەزىندە 1998 جىلعى 1 قاڭتارعا دەيىن، ياعني جيناقتاۋشى جۇيە ەنگىزىلگەنگە دەيىن ازىرلەنگەن ەڭبەك ءوتىلى ەسكەرىلەدى. سوندىقتان، مينيسترلىكتە حابارلاعانداي، زەينەتاقى جۇيەسىنىڭ تيىمدىلىگىن ارتتىرۋ جانە ازاماتتاردى جاقسى زەينەتاقى  مولشەرىمەن قامتاماسىز ەتۋ ماقساتىندا الەۋمەتتىك كودەكس جوباسى شەڭبەرىندە مىناداي وزگەرىستەر ەنگىزۋ جوسپارلانۋدا:

«زەينەتاقى جۇيەسىنىڭ تيىمدىلىگىن ارتتىرۋ جانە ازاماتتاردى زەينەتاقىنىڭ ءتيىستى مولشەرىمەن قامتاماسىز ەتۋ ماقساتىندا الەۋمەتتىك كودەكس جوباسى شەڭبەرىندە مىناداي وزگەرىستەر ەنگىزۋ ۇسىنىلادى:
ءبىرىنشى. 2023-2027 جىلدار ارالىعىنداعى كەزەڭدە ەڭ تومەنگى بازالىق زەينەتاقىنىڭ مولشەرىن كەزەڭ-كەزەڭىمەن ەڭ تومەنگى كۇنكورىس دەڭگەيىنىڭ شاماسىنان 54-تەن 70%-عا دەيىن، ەڭ جوعارى مولشەرىن 100-دەن 120%-عا دەيىن جەتكىزۋ كوزدەلىپ وتىر.
وسى كەزەڭدە بازالىق زەينەتاقى مولشەرى ورتا ەسەپپەن 51%-عا دەيىن ارتتىرىلاتىن بولادى. بۇل رەتتە بازالىق زەينەتاقىنىڭ ورتاشا مولشەرىنىڭ جىل سايىنعى ءوسۋى شامامەن 13% - دى قۇرايدى جانە بارلىق 2 ملن زەينەتكەرگە قاتىستى بولادى.
ەكىنشى. 2023 جىلعى 1 قاڭتاردان باستاپ زەينەتكە شىعاتىن ازاماتتار ءۇشىن ىنتىماقتى زەينەتاقىلاردى ەسەپتەۋ ءۇشىن پايدالانىلاتىن ەڭ جوعارى تابىستىڭ شاماسىن 46-دان 55 ايلىق ەسەپتىك كورسەتكىشكە دەيىن ارتتىرۋ كوزدەلەدى»، - دەدى ۆەدومستۆو.

ۇسىنىلىپ وتىرعان شارالار 2025 جىلعا قاراي جيىنتىق زەينەتاقىنى ورتا ەسەپپەن 27%-عا (3 جىل ىشىندە – 109-دان 138 مىڭ تەڭگەگە دەيىن) ارتتىرۋعا جانە جيىنتىق زەينەتاقىداعى مەملەكەتتىك تولەمدەردىڭ ۇلەس سالماعىن ارتتىرۋعا مۇمكىندىك بەرەدى. وسىلايشا، مەملەكەت قارت ادامدار اراسىندا كەدەيلىكتىڭ وسۋىنە جول بەرمەۋ بويىنشا مىندەتتەمەلەر قابىلدايدى.

Abai.kz