Қайрат Сатыбалдыға қатысты іс бойынша басқа да эпизодтар тергеліп жатыр. Бұл ҚР Сыбайлас жемқорлыққа қарсы іс-қимыл агенттігі төрағасының орынбасары Ұлан Сарқұлов айтты.

«Басты іс бойынша тергеу амалдары аяқталып, шешім шығарылды. Енді, ары қарай тиісті жұмыстар жүргізіледі», - деді Ұ. Сарқұлов Сенаттың жалпы отырысынан кейін тілшілер сұрағына жауап бере отырып.

Ұлан Сарқұлов Қайрат Сатыбалдыға қатысты үкімде қамтылған деректерден бөлек, қазір басқа эпизодтар тергеліп жатқанын нақтылады.

«Тергеу құпиялығын сақтау мәселесі бар екенін түсіну керек. Егер барлық деректерді ашық жарияласақ, онда бұл әрекет тергеуге кедергі келтіруі мүмкін», - деді агенттік төрағасының орынбасары.

Бұдан бұрын хабарланғандай, биыл қыркүйек айында Қайрат Сатыбалды 6 жылға сотталған болатын. Сонымен қатар, Бас прокуратура оған қатысты басқа істер қаралып жатқанын мәлімдеген.

Abai.kz