ҚР Премьер-Министрінің бірінші орынбасары – Қаржы министрі Ерұлан Жамаубаев алдағы уақытта Назарбаев зияткерлік мектептері мен Назарбаев университеті шығындарын арнайы эндаумент-қор жабатынын айтты.

«Жыл сайын республикалық бюджеттен Назарбаев зияткерлік мектептері мен Назарбаев университетін қаржыландыру азайып келеді. Осы орайда, арнайы эндаумент-қор құру қарастырылған және осы тұрғыда қаржыландыру іске асырылады. Jusan Bank аталған білім беру мекемелерін тікелей қаржыландыруы тиіс деген тұжырым мүлде дұрыс емес. Біріншіден, Jusan Bank басқа да екінші деңгейлі банктер сияқты коммерциялық бағытта қызмет етеді. Яғни, халықтың қаражатын тартады, өзінің капиталын құрады, экономикаға несие бөледі. Өзінің табысы есебінен акционерлер дивиденттері өседі. Ал акционерлер өз қаражатын эндаумент-қор аясында Назарбаев зияткерлік мектептеріне бағыттай алады. Сондықтан Jusan Bank-тен тікелей қаржыландыру болмауы керек», - деді Ерұлан Жамаубаев Сенатта тілшілер сұрағына жауап бере отырып.

Сонымен қатар ол қазіргі кезде аталған нарықта тұрақты жұмыс істеп жатқанын айтты.

«Аталған оқу орындарына бөлінген қаражаттың басым бөлігі республикалық бюджет есебінен қарастырылып келді. Болашақта оқу орындарының шығындарын толықтай аталған қор жабатын болады», - деді министр.

Abai.kz