Құрама Штаттар Таяу Шығысқа АҚШ қарулы күштеріндегі ең озық әскери ұшақ - F-35 жойғыш-бомбалағыштары мен эсминец жібереді. Сол арқылы Вашингтон Иран мен Ресейге белгі беріп отыр. Бұл туралы дүйсенбі күні америкалық әскер өкілі мәлімдеді.

АҚШ қорғаныс министрі Лллойд Остиннің осындай шешім қабылдауына Ормуз бұғазындағы халыралық су аумағында Иранның екі танкерді басып алуға талпынғаны себеп болды. Бұл оқиға екі апта бұрын тіркелген. Ұшақтар мен кеме Таяу Шығысқа барып, маңызды теңіз жолдарының қауіпсіздігін қадағалайды дейді Пентагон өкілі Сабрина Синг.

Пентагонды Иранның осы әрекеті ғана алаңдатып отырған жоқ деп жазды Wall Street Journal. Америкалық әскерилердің айтуынша, кейінгі уақытта америкалық ұшқышсыз ұшақтар Сирия аспанында ресейлік ұшақтардың нысанына айналған. Олар америкалық дрондардың радикал террористік топтарға қарсы операциялар жүргізуге кедергі жасаған.

Өткен аптада ресейлік барлау ұшағы Сирияның оңтүстік-шығысындағы америкалық әскери базасының үстінен ұшып өткен. Пенгатонның пікірінше, Ресей осы әрекеті арқылы Вашингтонға қысым жасауға талпынып отыр.

Озық үлгідегі жойғыш-бомбалағыштар көмегімен Пентагон түрлі жағдайларға қатысты тез арада әрекет ете алады.

Abai.kz