Қазақстанда ақбөкендерді ату тоқтатылды. Бұл туралы экология және табиғи ресурстар министрі Ерлан Нысанбаев баяндады, деп хабарлайды Abai.kz.

Министрдің айтуынша, киікті ату отандық ғалымдармен және халықаралық сарапшылармен консультациялар мен талқылаулардан кейін тоқтатылған.

– Қыста қозғалыс қиын. Сондықтан 10 ақпаннан бастап біз ақбөкендердің санын реттеу процесін тоқтаттық. Былтырғы жылды ескере отырып, биыл мамыр айында егжей-тегжейлі есеп жүргізіледі", - деді экология министрлігінің басшысы мәжіліс кулуарында.

Бұл шешім 10 ақпаннан бастап күшіне енді. Болжам бойынша аталмыш аңдарды ату тоқтатылса, көктемде ақбөкен санының 40% артуы болжанып отыр. Ал былтырғы популяцияны ескергенде олардың саны шамамен 2,5–2,6 млн басты құрайды.

Ал таяуда экология және табиғи ресурстар министрлігі 2024 жылы киікті атуға әуесқойларға да рұқсат беру мәселесін пысықтап жатқаны хабарланған еді.

Abai.kz