Ақсу ауданы Суықсай ауылы тұрғындарында соңғы жылдары тыныштық болмай жүр.  Айтуларынша, Жетісу облысында белгісіз біреулер алтын кенін жаппай қазып, 25 шақырымға жуық жерден тереңдігі 2 метрден асатын шұңқырларды қалдырып кете берген.

"Келіп жерді қазып тастайды. Бұлай жасауға болмайды ғой. Жерді де, жолды да қазып кеткен. Ешкімнен сұрамай, ойына келгенін жасап жатыр", – деді Суықсай ауылының тұрғыны Ғалымбек Сейсебаев. 

Өңір тұрғындары бұл мәселенің бірнеше жылдан бері жалғасып келе жатқанын алға тартып, тиісті мекемелердің осы мәселеге қатысы бар ма деп күдіктенеді.

"Бұл жұмыстар ұзаққа созылып кетті, тоқтату қажет. Бірінші жыл бұлай болып жатқан жоқ, оны бәрі біледі. Мұны бақылауға алатын тиісті органдар қайда қарап отыр? Жайлауға шығатын жолдың түгін қалдырмады", – деді Суықсай ауылының тұрғыны Сайлау Сексенбаев.

Аудан әкімінің орынбасары бұл мәселені кеше ғана білгенін айтып ақталды. Аталмыш мәселені құқық қорғау органдарына тапсырып, тұрғындар тілегі ескеріледі деп сендірді.

"Мұның барлығы заңсыз жұмыстар. Бізден де, басқа органдардан да рұқсат алмаған. Біздің өзіміз соңғы екі-үш күнде естіп жатырмыз. Бізге ешкім айтпады", – деді Ақсу ауданы әкімінің орынбасары Амандос Сабырбаев. 

Тұрғындар егер мұнымен заңсыз іс бітпесе, жоғарыға шағымданамыз деп отыр.

Дариға Ержанқызы

Abai.kz