Қазір еліміз жастардың білім алу, жұмысқа орналасу, кәсіп ашып, экономикалық жағдайларын түзеу салаларына көптеген жобалар арқылы қолдау көрсетіп келеді.

Өңірлерде ашылған жастарды қолдау орталықтары да қазақ жастарының қоғамды түсініп, ел саясатына үн қосуына жетекшілік етуден танбай келеді. Біз осы орайда өңір жастарының тыныс-тіршілігін білу үшін Қарағанды облысының «Жасыл ел» еңбек жасақтарының жетекшісі Сұлтан Шаймағамбеттің пікірін білдік.

Сұлтан Шаймағамбет:

– «Жасыл ел» Қарағанды облысында 2005 жылдан бастап жұмыс атқарып келеді. Бұл – республика бойынша ауқымды жобалардың бірі. Қазір әр өңірде  жұмыс істейтін ұйымға айналды. Бір қазір осы жоба арқылы облысымыздағы жастарды, студенттерді жұмыспен қамтып, олардың бос уақытын тиімді қолдану арқылы еңбекке баулу, экологиялық мәдениетке бағыттауға жетелеудеміз. Сонымен бірге облыс жастарын мемлекеттік саясатқа, оның ішінде жастар саясатына өз үлестерін қосу, араласуға да осы бағдарлама арқылы жүзеге асырудамыз.

Әр жыл сайын осы бағдарламаға қатысып, жұмыс істейтін жастардың саны артып келеді. Бұған облыс басшылары да өз көмектерін беруде. Жалпы жазғы үш айдың  ішінде жастарымыз тек жұмыспен айналысып қана қоймай, өздеріне жетекшілік ететін әр сала мамандарынан сабақ алады, тәжірибе жинайды. Облыста болып жатқан жаңалықтар, оқиғалар туралы да дер кезінде хабардар болып отырады. Сондықтан «Жасыл ел» бағдарламасы жастарымыздың мемлекеттік саясатқа араласуына жол көрсететін жақсы бастама дер едік.

«Жасыл ел» бағдарламасына қатысқан жастарымыздың ой-өрісі кеңейіп, еңбек істеу, қоғамдық жағдайларды түсіну сияқты жақтарда елгезектік таныта алады. Жалпы қоғамды түсінген адам бәрін түсіне алады десек артық емес. Біз жастарымыздың осы жобаға қатысып, айналасын барлап, еліміздің мемлекеттік саясатын, жүзеге асырып отырған реформаларын бағамдауына нұсқаушы боламыз. Тіпті жастарымыздың оқуға түсуіне, шетелдерде оқуына да осы бағдарламадан алған тәжірибесі көмектесе алады. Сол үшін бұл бағдарлама жастарымыздың болашағына септігін тигізіп жатыр десек артық айтқан болмаймыз.

Әр өңірдің өзіндік ерекшеліктері бар. Қарағанды облысы өте үлкен. Бес қала бізге қарайды. Соған байланысты жастардың көбі қалада шоғырланған. Бірақ олар әр саламен айналысады. Облыс басшыларының бұған көрсетіп жатқан қолдауы өте ауқымды. Жастарға арналған мемлекеттік бағдарламадан бөлек облыстың өзінің де жүзеге асыратын жобалары жеткілікті. Мысалы, жұмыспен қамту, жастарға арналған тұрғын-үй бағдарламасы, облыс әкімінің жастарға арналған гранты сияқтыларды айтуға болады. Оның үстіне шаруашылықпен айналысатын жастарды қолду үшін де көптеген орталықтар ашылған. Айталық, жақында ашылған жастардың бірінші кеңесінде Қарағанды қаласына орналасқан Ленин атындағы кино-театрды жастар үйі ретінде пайдалану туралы шешім шықты. Бұл да өте үлкен қолдау деп білеміз. Осыдан кейін жастар мемлекетіміздің, облысымыздың қолдауын түсініп, өз армандары үшін қарқынды жұмыстар істейді деген ойдамыз.

Мен өзім де әлі де жастар санатындамын. Қоғамдық бірлестік төрағасымын. Осы «Жасыл ел» еңбек жасақтарының облыстық жетекшісімін. Биылдан бастап жаңа сайланған Қарағанды облыстық қоғамдық кеңестің мүшесімін. Мен сияқты осы салада істей жүріп мемлекеттік саясатқа араласып жүрген жастар облысымызда көп. Мемлекет басшысының бастамасымен көтерілген жалпы ұлттық экологиялық «Таза Қазақстан» акциясы аясында жастарымыз жаз бойы жұмыстан тыс оқытылды әрі «Жасыл ел» жастар жасағы атынан көптеген жастар өте белсенділік танытты. Сол үшін бұл акцияны жаз бойы Қарағанды облысы аумағында «Жасыл ел» жастар жасағы мүшелері жүзеге асырып келеді.

Abai.kz