Балқаш - еліміздің оңтүстік-шығысынан орын тепкен тұйық көл. Аумағы жөнінен Каспий, Арал теңіздерінен кейінгі үшінші орындағы су айдыны Алматы, Жамбыл, Қарағанды облыстарының шегінде жатыр. Теңіз деңгейінен 360 м биіктікте жатқан көлдің ауданы құбылмалы:17-22 мың шаршы шақырым, ұзындығы 600 шақырымнан астам, ені шығыс бөлігінде 9-19 ш, батыс бөлігінде 74 ш-ға жетеді. Орташа тереңдігі 6 м, ең терең жері 26 м. Көптеген шығанақ, қойнаулары болғанымен, аралдары аз (Басарал, Тасарал). Балқашта балықтың 20-дан астам түрі бар, мұның 6 түрі ежелден көлдің өзінде өскен балықтар (Іле, Балқаш көкбасы, Балқаш алабұғасы, т.б.), Бәрі жақсы дегенімен, Қытайдан бастауын алатын Іле өзенінің суы жыл сайын  азайып келе жатқандығы қауіп бұлтын қоюлата түседі. Бұл өз кезегінде орташа тереңдігі алты-ақ метр Балқаш көлінің тартылып, түбіндегі тұздың ауаға ұшуына, сөйтіп жақында орналасқан тау мұздықтарының еруіне және көлдің айналасында мекендейтін халықтың денсаулығына кері әсерін тигізетін болады.