Белгілі қазақ ақыны Олжас Сүлейменов Бейбітшілік бойынша Нобель сыйлығына ұсынылды, деп хабарлады «Байтақ» жасылдар партиясының баспасөз қызметі.

«Бүгін Алматыда өткен «Байтақ» жасылдар партиясы Алматы қалалық филиалының 5-ші конференциясында тарихи әрі маңызды шешім қабылданды. Партия төрағасы Азаматхан Әміртаев қазақтың көрнекті жазушысы, ақын, қоғам қайраткері, «Невада-Семей» антиядролық қозғалысының негізін қалаушы Олжас Сүлейменовті Бейбітшілік саласындағы Нобель сыйлығына ресми түрде ұсынғанын хабарлады», - делінген ақпаратта.

Ресми ақпаратта: Бұл бастама тек Қазақстанның ғана емес, бүкіл әлемнің тыныштығы үшін аянбай еңбек еткен дара тұлғаның еңбегін жоғары деңгейде мойындау болып табылады делінген.

«Олжас Сүлейменовтің тарихи рөлі, әсіресе оның «Невада-Семей» қозғалысындағы қызметі Семей ядролық полигонын жабудың шешуші факторы болды. Оның үстіне, оның бастамасы мен Қазақстанның халықаралық аренадағы белсенді жұмысының арқасында бірнеше елде, соның ішінде АҚШ-тың Невада штатында тағы төрт ірі ядролық сынақ полигоны жабылды. Бұл жаһандық қауіпсіздікке қосылған қомақты үлес», - дейді «Байтақ» жасылдар партиясы.

Abai.kz