Бүгін Мемлекет басшысы Қасым-Жомарт Тоқаев Астанада барлық деңгейдегі мәслихат депутаттарының ІІІ республикалық форумына қатысып, елдегі конституциялық өзгерістер туралы айтты.

Соның ішінде президент Тоқаев жаңа Конституция жобасындағы мемлекеттік тіл – қазақ тілінің мәртебесі туралы да сөз қозғады.

«Осы орайда қазақ тілінің мәртебесі төмендеді деп байбалам салудың қажеті жоқ. Жаңа Конституция жобасында «Қазақстан Республикасының мемлекеттік тілі – қазақ тілі» деп нақты жазылған.

Бұл ретте ана тіліміз тек көркем әдебиетте ғана емес, еліміздің қоғамдық-саяси өмірінің барлық саласында кеңінен қолданылады. Ең маңыздысы, жастар арасында қазақша сөйлеу сәнге айналды. Басқаша айтқанда, қазақ тілінің болашағы жарқын.

Кейбіреулер тіл тағдырына алаңдаған кейіп танытып, бұл тақырыпты саяси құрал ретінде пайдаланады.

Қазақ жастары жаңашылдыққа тез бейімделе алуымен ерекшеленеді. Олар қазақша мен орысшаны қоса алғанда, үш-төрт тілді еркін меңгереді. Мұны айналамыздан күнде көріп жүрміз», - деді Тоқаев.

Abai.kz