Жұма, 20 Қараша 2026
Жаңалықтар 109 0 пікір 20 Қараша, 2026 сағат 14:20

8 миллиардтың есебі: Легионерлерге кететін ақша

Сурет: olympics.com сайтынан алынды.

Қазақстан спортындағы ең өзекті әрі қоғамның қызу талқысына түскен мәселе – шетелдік легионерлерді мемлекет қаржысына асырау тәжірибесіне нүкте қойылды.

Туризм және спорт министрі Ербол Мырзабосыновтың ОКҚ мінберінде жасаған мәлімдемесі бұл реформаның алғашқы нақты жемісін көрсетіп отыр: 2026 жылы бюджеттен 8 млрд теңгеден астам қаражат үнемделген.

Бұл жай ғана цифр емес, жылдар бойы қалыптасқан ескі жүйенің күйреуі мен отандық спортты сауықтырудың алғашқы қадамы.

Бюджет қаржысы қайда бағытталады?

Бұған дейін аймақтық бюджеттердің басым бөлігі кәсіби клубтардағы келімсек ойыншылардың миллиондаған жалақысы мен сыйақысына жұмсалып келгені жасырын емес. Енді кәсіби клубтарды қаржыландыруға бірыңғай шек (лимит) қойылып, үнемделген 8 миллиард теңге мынадай стратегиялық бағыттарға бұрылды:

Балалар мен жасөспірімдер спорты: Болашақ чемпиондарды тәрбиелейтін іргетасты нығайту.

Бұқаралық спорт: Халықтың денсаулығы мен спортқа қолжетімділігін арттыру.

Ұлттық құрамаларды даярлау: Халықаралық аренада ел намысын қорғайтын өз өрендерімізге жағдай жасау.

Спорт инфрақұрылымы: Өңірлердегі ескірген нысандарды жаңарту және жаңа алаңдар салу.

Өңірлік теңсіздік жойылды: Төлемдер біріздендірілді

Реформаның тағы бір маңызды қыры – спортшылар мен бапкерлерге төленетін ай сайынғы ең төменгі төлемдердің өңірге қарамастан бірдей белгіленуі. Бұрын бай облыстар чемпиондарға қомақты қаржы төлесе, дотациялық өңірлердің спортшылары шетқақпай қалып жататын. Енді барлық аймақ үшін:

Олимпиада және Паралимпиада жеңімпаздарына - 250 АЕК (1 081 250 теңге); Жаттықтырушыға 125 АЕК (540 625 теңге), ал, Қазақстан чемпионатының жеңімпаздарына - 60 АЕК (259 500 теңге) Жаттықтырушыға - 30 АЕК (129 750 теңге) төлейтін ортақ стандарт енгізілді.

Сонымен қатар, параспортшыларға қосымша қолдау тетіктерінің қарастырылуы – әлеуметтік әділеттілік пен инклюзивті спортты дамытудың нақты көрінісі.

Түйін: Мемлекет қаржысына шетелдік спортшыларды «бағу» – уақытша нәтижеге ғана жұмыс істейтін, болашағы бұлыңғыр жол еді. Кәсіби клубтар енді демеушілер тартуға, өз өнімдерін сатуға және менеджментті дамытуға мәжбүр болады. Ал мемлекет өз міндетін – ұлт саулығы мен жас буынның спорттық әлеуетін көтеруді қолға алды. 8 миллиард теңге – бұл бастамасы ғана. Ендігі міндет – осы қаржының талан-таражға түспей, ауыл мен қаладағы қарапайым балалардың игілігіне жетуін қатаң бақылауда ұстау.

Abai.kz

0 пікір