Астанада Түркі академиясының ұйымдастыруымен Ортақ түркі әліпбиі жөніндегі комиссияның төртінші отырысы өтті.

Әзербайжан, Қазақстан, Қырғызстан және Түркиядан келген қатысушылар 2022 жылы қабылданған 34 әріптен тұратын ортақ түркі әліпбиін енгізу және оны практикалық қолдану бойынша ұсыныстарды талқылады. Түркі академиясының президенті Шаин Мұстафаев әліпбиге деген қызығушылықтың артқанын атап өтіп, оның негізінде жарық көрген басылымдарға тоқталды.

«Қазіргі кезеңде ортақ әліпбиді қолданудың бірыңғай тәсілдерін келісу және оны практикалық жүзінде қолданудың негізгі принциптерін пысықтау ерекше өзектілікке ие болды. Түркі академиясы ортақ түркі әліпбиін танымал ету мақсатында бірқатар басылымдар дайындады. 2025 жылы алғаш рет осы әліпбиді пайдалана отырып, қазақ тілінде Абайдың «Qara Sözder» кітабы және қырғыз тілінде Шыңғыс Айтматовтың «Aq Keme» шығармасы жарық көрді», — деді Мұстафаев.

Отырыстың негізгі тақырыбы түркі тілдеріне арналған ортақ әліпбиді енгізу жөніндегі ұсыныстарды талқылау, сондай-ақ оны практикалық қолданудың принциптері мен механизмдерін келісу болды. Астанадағы отырыс қорытындысы бойынша қол қойылған Декларация түркі елдерінің бұл әліпбиді алдағы уақытта да енгізуін қолдайтынын растайды.

Бұған дейін Түркия президенті Режеп Тайып Ердоған бірыңғай түркі әліпбиін белсендірек қолдануды жақтаған болатын.

Abai.kz