استانادا تۇركى اكادەمياسىنىڭ ۇيىمداستىرۋىمەن ورتاق تۇركى ءالىپبيى جونىندەگى كوميسسيانىڭ ءتورتىنشى وتىرىسى ءوتتى.

ازەربايجان، قازاقستان، قىرعىزستان جانە تۇركيادان كەلگەن قاتىسۋشىلار 2022 جىلى قابىلدانعان 34 ارىپتەن تۇراتىن ورتاق تۇركى ءالىپبيىن ەنگىزۋ جانە ونى پراكتيكالىق قولدانۋ بويىنشا ۇسىنىستاردى تالقىلادى. تۇركى اكادەمياسىنىڭ پرەزيدەنتى شاين مۇستافاەۆ الىپبيگە دەگەن قىزىعۋشىلىقتىڭ ارتقانىن اتاپ ءوتىپ، ونىڭ نەگىزىندە جارىق كورگەن باسىلىمدارعا توقتالدى.

«قازىرگى كەزەڭدە ورتاق ءالىپبيدى قولدانۋدىڭ بىرىڭعاي تاسىلدەرىن كەلىسۋ جانە ونى پراكتيكالىق جۇزىندە قولدانۋدىڭ نەگىزگى پرينتسيپتەرىن پىسىقتاۋ ەرەكشە وزەكتىلىككە يە بولدى. تۇركى اكادەمياسى ورتاق تۇركى ءالىپبيىن تانىمال ەتۋ ماقساتىندا بىرقاتار باسىلىمدار دايىندادى. 2025 جىلى العاش رەت وسى ءالىپبيدى پايدالانا وتىرىپ، قازاق تىلىندە ابايدىڭ «Qara Sözder» كىتابى جانە قىرعىز تىلىندە شىڭعىس ايتماتوۆتىڭ «Aq Keme» شىعارماسى جارىق كوردى»، — دەدى مۇستافاەۆ.

وتىرىستىڭ نەگىزگى تاقىرىبى تۇركى تىلدەرىنە ارنالعان ورتاق ءالىپبيدى ەنگىزۋ جونىندەگى ۇسىنىستاردى تالقىلاۋ، سونداي-اق ونى پراكتيكالىق قولدانۋدىڭ پرينتسيپتەرى مەن مەحانيزمدەرىن كەلىسۋ بولدى. استاناداعى وتىرىس قورىتىندىسى بويىنشا قول قويىلعان دەكلاراتسيا تۇركى ەلدەرىنىڭ بۇل ءالىپبيدى الداعى ۋاقىتتا دا ەنگىزۋىن قولدايتىنىن راستايدى.

بۇعان دەيىن تۇركيا پرەزيدەنتى رەجەپ تايىپ ەردوعان بىرىڭعاي تۇركى ءالىپبيىن بەلسەندىرەك قولدانۋدى جاقتاعان بولاتىن.

Abai.kz