Алматыдағы ірі базардың бірі - «Баянауылдың» есігіне қара құлып салынды. Автокөліктердің қосалқы бөлшектерін сатумен нәпақасын тауып отырған үш мыңнан астам кәсіпкерлер үйреншікті жұмыс орындарына жіберілмеді.

Оқиға орнында болғандардың айтуынша, сатушылар мен әкімшілік қызметкерлері арасында түсінбеушілік туып, іске арнайы жасақ араласқан. Бұл әрекетті базар басшылығының арандатуы деп түсіндіргеннен кейін, кәсіпкерлер сабасына түскен.

«Базар басшылығы 8-қаңтарға дейін аумақты босатуы керек еді. Бірақ ешқандай әрекет болмағандықтан бүгін соттың шешімін орындауға келіп тұрмыз. Жалпы базардың жұмысын тоқтату жайлы шешім бір жарым жыл бұрын шыққан еді. Бірақ базар басшылығының жоғары сотқа шағымдануына байланысты шешімді орындау кейінге қалдырылды. Бірақ ол бәрібір жеңілді», — деп түсіндірді базардың жабылуын Алматы қалалық сотының шешімін орындауға келген мемлекеттiк сот орындаушы Рахым Орынбаев «Алматы» арнасына берген сұхбатында.

Енді бір аптаның ішінде базардағы барлық дүние-мүлік көшірілуі тиіс. Базардан босаған орынға балабақша мен мектеп салынады деп жоспарлануда екен.

Абай-ақпарат.