الماتىداعى ءىرى بازاردىڭ ءبىرى - «باياناۋىلدىڭ» ەسىگىنە قارا قۇلىپ سالىندى. اۆتوكولىكتەردىڭ قوسالقى بولشەكتەرىن ساتۋمەن ناپاقاسىن تاۋىپ وتىرعان ءۇش مىڭنان استام كاسىپكەرلەر ۇيرەنشىكتى جۇمىس ورىندارىنا جىبەرىلمەدى.

وقيعا ورنىندا بولعانداردىڭ ايتۋىنشا، ساتۋشىلار مەن اكىمشىلىك قىزمەتكەرلەرى اراسىندا تۇسىنبەۋشىلىك تۋىپ، ىسكە ارنايى جاساق ارالاسقان. بۇل ارەكەتتى بازار باسشىلىعىنىڭ ارانداتۋى دەپ تۇسىندىرگەننەن كەيىن، كاسىپكەرلەر ساباسىنا تۇسكەن.

«بازار باسشىلىعى 8-قاڭتارعا دەيىن اۋماقتى بوساتۋى كەرەك ەدى. بىراق ەشقانداي ارەكەت بولماعاندىقتان بۇگىن سوتتىڭ شەشىمىن ورىنداۋعا كەلىپ تۇرمىز. جالپى بازاردىڭ جۇمىسىن توقتاتۋ جايلى شەشىم ءبىر جارىم جىل بۇرىن شىققان ەدى. بىراق بازار باسشىلىعىنىڭ جوعارى سوتقا شاعىمدانۋىنا بايلانىستى شەشىمدى ورىنداۋ كەيىنگە قالدىرىلدى. بىراق ول ءبارىبىر جەڭىلدى»، — دەپ ءتۇسىندىردى بازاردىڭ جابىلۋىن الماتى قالالىق سوتىنىڭ شەشىمىن ورىنداۋعا كەلگەن مەملەكەتتiك سوت ورىنداۋشى راحىم ورىنباەۆ «الماتى» ارناسىنا بەرگەن سۇحباتىندا.

ەندى ءبىر اپتانىڭ ىشىندە بازارداعى بارلىق دۇنيە-مۇلىك كوشىرىلۋى ءتيىس. بازاردان بوساعان ورىنعا بالاباقشا مەن مەكتەپ سالىنادى دەپ جوسپارلانۋدا ەكەن.

اباي-اقپارات.