Атыраудағы жиын кезінде президент Нұрсұлтан Назарбаев Сауат Мыңбаевтың алғыстан басталған баяндамасын бөліп тастап, аймақта жүзеге асып жатқан маңызды мұнай жобалары туралы айтуды талап етті.

Бұл туралы Today.kz-ке сілтеме жасап NUR.KZ хабарлайды.

«ҚазМұнайГаз» ұлттық компаниясының басқарма басшысы Сауат Мыңбаев өз баяндамасында 2,7 миллиард доллар көлеміндегі транш үшін Назарбаевқа алғыс айта бастаған.

«Сенің барлық сөзің тек алғыс айту ғана болып тұр. Біресе билікке, біресе… Одан да қазіргі жағдайды айт. Инвесторлармен қалай жұмыс істеп жатсыңдар? «Шевронды» дамыту мәселесі қалай болып жатыр? «Қашаған» не болды?», – деді Мыңбаевтың сөзін бөлген президент.

«Мен тек әлеуметтік маңыздары жөнінде айтқым келген… “Теңіз Шевройл” туралы айтар болсам, болашақ дамыту жобалары 38 млрд долларға шықты. Содан соң, қазіргі жағдайда барлық мердігерлермен бюджетті қысқарту туралы келіссөз жүргізу туралы шешім қабылданды. Жұмыс келесі жылдың мамырынан басталады деп күтілуде. ТШО акционерлері жоба іске асады деп сендірді», – деді Мыңбаев.

Осыдан соң, президент Сауат Мыңбаевқа нақты тапсырма берді.

«Міне, «ҚазМұнайГаз», билік және министрлік  ТШО-мен бірлесіп осы жұмыстарды атқару керек», – деп атап өтті елбасы.

Сонымен қатар, елбасы Солтүстік-Каспий жобасы бойынша акционерлердің шағымын айтты.

«Мен Eni басшылығымен сөйлестік. Олар бізде келісімнің жоқтығын айтты. Барлығын біріктіретін орган жоқ екен. Мұны не билік, немесе «Қашаған» акционерлерінің бірі ретінде ҚМГ атқару керек. Владимир Сергеевич (энергетика министрі Владимир Школиник – nur.kz), мұнымен айналысатын сен емес пе?» , – деді президент.

Владимир Школьник компаниялар мен органдардың бір мақсат үшін жұмыс істейтініне сендірді.

Абай-ақпарат