Баяндама мәліметі бойынша, Ресей басқаратын одақтағы тауар айналымының төмендеуіне сауда мәселелеріндегі өзара түсінбеушілік, санкциялар режимі және аймақтағы экономикалық дағдарыс әсер еткен. Сарапшылар ЕАЭС жобасы «аймақта Ресей ықпалын ұлғайтып, ұйымның басқа мүшелерінің Батыспен қатынасын шектейді» деп есептейді, делінген баяндамада.

Қазақстан, Ресей және Беларусь басшылығы Кеден одағы аясында ЕАЭС құрған уақытта, одаққа бірігудегі мақсат - экономиканы күшейту, ортақ тауар нарығын, капиталын, жұмыс күшін қалыптастыру деп мәлімдеген еді. 2015 жылы одаққа Қырғызстан және Армения кірді.

Трансшекара сауда тәртібін жеңілдету, еңбек мигранттарына жағдай жасау секілді жеңілдіктер қарастыратын ЕАЭС оған мүше елдердің экономикаларын әлемдік нарықтан алшақтата түседі, делінген баяндамада.

Ресейдің бұл ұйымды экономикалық бірлестік қана емес, «көрші елдерге ықпал ету тетігі» ретінде қабылдауы одақтың өз ішінде қайшылық туғызады деп есептейді ICG баяндамасының авторлары.

Абай-ақпарат