Митингіге қатысқандар көшеге Иран туларын ұстап шығып, дінбасылар бақылайтын Иран үкіметін қолдап ұрандады. Олар Құрама Штаттарды, Сауд Арабиясын және басқа елдерді наразылық шеруіне қолдау білдіріп отыр деп айыптады. Хаменеи бірер күн бұрын жаппай митингті "Иранның жаулары" ұйымдастырып отыр деген.

Иранда үкіметке қарсы наразылық шарасы 28 желтоқсанда басталып, бірнеше қалаларды жайылды. Олар бастапқыда экономикалық мәселелерді алға тартқан, кейін саяси рең алды. Содан бері шерулерде кем дегенде 20 демонстрант пен бір полиция қызметкері қаза тапты. Тегеранда 30 желтоқсанда 450-ден астам демонстрант ұсталды.

Иран билігін ашық сынап келген АҚШ президенті Дональд Трамп наразылық акциясына қатысушыларды ашық қолдады. "Уақыт келгенде Құрама Штаттар тарабынан үлкен қолдау көретін боласыздар", – деп мәлімдеді сәрсенбі күні АҚШ президенті демонстранттарға арнап.

Еуропа Одағы елдері мен АҚШ басшылары үкіметке қарсы шерулерде адам шығыны болғанын және жүздеген демонстранттың тұтқындалғанын айыптады. Вашингтон Тегеран бейбіт демонстранттардың билікке деген наразылығын еркін білдіруіне рұқсат беруі керегін мәлімдеп, бұл оқиғаларға қатысты БҰҰ Қауіпсіздік кеңесінің шұғыл жиынын өткізуге шақырды.

Abai.kz