يراندا ۇكىمەتتى قولدايتىن شەرۋ ءوتتى
يراننىڭ بىرنەشە قالالارىندا سارسەنبى كۇنى ەلدىڭ بيلىگىن قولدايتىن شەرۋ ءوتتى. ولار ءبىر اپتا بويى جالعاسىپ جاتقان جاپپاي نارازىلىق شاراسىنا قارسىلىق ءبىلدىردى.
ميتينگىگە قاتىسقاندار كوشەگە يران تۋلارىن ۇستاپ شىعىپ، ءدىنباسىلار باقىلايتىن يران ۇكىمەتىن قولداپ ۇراندادى. ولار قۇراما شتاتتاردى، ساۋد ارابياسىن جانە باسقا ەلدەردى نارازىلىق شەرۋىنە قولداۋ ءبىلدىرىپ وتىر دەپ ايىپتادى. حامەنەي بىرەر كۇن بۇرىن جاپپاي ميتينگتى "يراننىڭ جاۋلارى" ۇيىمداستىرىپ وتىر دەگەن.
يراندا ۇكىمەتكە قارسى نارازىلىق شاراسى 28 جەلتوقساندا باستالىپ، بىرنەشە قالالاردى جايىلدى. ولار باستاپقىدا ەكونوميكالىق ماسەلەلەردى العا تارتقان، كەيىن ساياسي رەڭ الدى. سودان بەرى شەرۋلەردە كەم دەگەندە 20 دەمونسترانت پەن ءبىر پوليتسيا قىزمەتكەرى قازا تاپتى. تەگەراندا 30 جەلتوقساندا 450-دەن استام دەمونسترانت ۇستالدى.
يران بيلىگىن اشىق سىناپ كەلگەن اقش پرەزيدەنتى دونالد ترامپ نارازىلىق اكتسياسىنا قاتىسۋشىلاردى اشىق قولدادى. "ۋاقىت كەلگەندە قۇراما شتاتتار تارابىنان ۇلكەن قولداۋ كورەتىن بولاسىزدار", – دەپ مالىمدەدى سارسەنبى كۇنى اقش پرەزيدەنتى دەمونسترانتتارعا ارناپ.
ەۋروپا وداعى ەلدەرى مەن اقش باسشىلارى ۇكىمەتكە قارسى شەرۋلەردە ادام شىعىنى بولعانىن جانە جۇزدەگەن دەمونسترانتتىڭ تۇتقىندالعانىن ايىپتادى. ۆاشينگتون تەگەران بەيبىت دەمونسترانتتاردىڭ بيلىككە دەگەن نارازىلىعىن ەركىن بىلدىرۋىنە رۇقسات بەرۋى كەرەگىن مالىمدەپ، بۇل وقيعالارعا قاتىستى بۇۇ قاۋىپسىزدىك كەڭەسىنىڭ شۇعىل جيىنىن وتكىزۋگە شاقىردى.
Abai.kz
