Астана: ЕАЭО саяси бірлестік емес
![](http://abai.kz/content/uploads/2018/03/B6F69213-18FF-4008-A220-B82E3D62D6A0_cx0_cy10_cw0_w1023_r1_s.jpg)
"Еуразия экономикалық одағы саяси бірлестік емес. Одақ туралы келісімді жасауда мүше елдер оны саясиландырудан және одақ құзырына ұлттық егемендікке қатысты мәселелерді қосудан бас тартқан" деді Қазақстанның сыртқы істер министрінің ресми өкілі Жайнақов.
Бұл Қазақстан сыртқы істер министрлігінің (СІМ) Ресей сыртқы істер министрі Сергей Лавровтың "Қазақстанның АҚШ азаматтарына елге визасыз келуіне рұқсат беруі мәселесін талқылау керек" деген мәлімдемесіне берген жауабы.
Ресейлік БАҚ-тың хабарлауынша, Сергей Лавров бұған дейін "Ресей - мүмкіндіктер елі" деп аталатын форумда Қазақстанның АҚШ азаматтарына визасыз елге келуіне рұқсат беру жайын "Еуразия экономикалық одағы (ЕАЭО) аясында келісу қажетін" мәлімдеген. Лавровтың сөзінше, ЕАЭО-да визасыз жүріп-тұру ережесі бар.
Лавров форумда өзіне бұл туралы қойылған сұраққа қатысты жауабында Қазақстанның АҚШ азаматтарына визасыз режим орнатқанын "бұған дейін білмегенін" айтқан. Ол 16 наурызда Астанаға барған кезінде бұл мәселе жайлы қазақстандық әріптесімен сөйлесетінін де жеткізген.
Abai.kz