Сырбойылық спортшы Әсемгүл Ердәулет Хорватияның Умаг қаласында өткен каратэ-додан әлем кубогында чемпион атанды, - деп хабарлайды Абай-ақпарат.

Әсемгүл 14-15 жас аралығында жасөспірімдер арасында 47 келі салмақта сынға түскен. Ол чемпионатта барлығы алты кездесу өткізген.

Қызылордалық спортшы алдымен Латвиядан келген қарсыласын қапы қалдырса, одан италиялық, словакиялық, кипрлік спортшылардан басым түсті. Ал жартылай финалда румындық спортшыны жарыс жолынан тайдырды. Финалдық бәсекеде Иорданиядан келген спортшы жерлесімізге қарсы тұра алған жоқ. Алда Әсемгүл әлем чемпионатына қатысады. Аталмыш дода биыл қазан айында Чилиде өткізіледі.

Abai.kz