ءاي، «اقىماق» باۋىرىم-اي! وزىڭمەن وسكەمەندە اكىم بولىپ جۇرگەنىڭدە ءبىر توپ ەلگە تانىمال ونەرپازداردى باستاپ بارىپ تانىسىپ ەدىم. كابينەتىڭە كىرگەنىمدە، كەيبىر كرەسلوعا جابىسىپ تۋعانداي «ۆەليكيي» اكىمدەردەي شىرەنبەي، ورنىڭنان اتىپ تۇرىپ سالەم بەرىپ قارسى الىپ ەدىڭ. كەلگەن شارۋاممەن تانىسىپ، ءار جانرلى قازاق ءتىلدى كونتسەرتىمىزدىڭ، ورىس ءتىلدى وسكەمەندە انشلاگپەن وتۋىنە جاعداي جاساپ ەدىڭ.

وسكەمەندەگى جاساعان ەڭبەگىڭدى ەل دە كورىپ، ەلباسى دا كورىپ، جوعارىعا ءوسىپ كەتىپ ەدىڭ. جوعارىعا بارىپ جولىڭ بولمادى.

مەملەكەتتىڭ 300 ميلليارد قارجىسىن تالان-تاراجدان ساقتايمىن – دەپ، باسىڭ بالەگە قالىپتى. مۇنداي «اقىماق» بولارمىسىڭ؟!...

جوعارىداعى وليگارحتاردىڭ شەت ەلدەگى وفشورداعى ميلليونداعان دوللارلارى جەتى اتاسىنان قالدى – دەپ پە ەدىڭ، ول وسىنداي «مايشەلپەكتەردىڭ» ناتيجەسى ەكەنىن قالاي بىلمەدىڭ؟ 300 ميللياردتى ءبولىپ وتىرعاندارمەن «ءتىل تابىسساڭ» ساعان قۇرىعاندا 30 ميلليون، «پوۆيدەنيەڭ» ءۇناسا، 300 ميلليوندى قالتاعا باسىپ، «تالتاڭداپ» جۇرەر ەدىڭ! نە دەگەن «اقىماقسىڭ»؟

سەن ابايدىڭ «ماسعۇت» پوەماسىن وقىماعان ەكەنسىڭ. وقىساڭ بۇل اقىمىقتىقتى جاساماس ەدىڭ.

ايتايىن تىڭدا! پاتشانىڭ ءۋازىرى ماسعۇتقا تۇسىندە قىدىر اتا ايان بەرەدى:
- ەرتەڭ ءبىر كەسەپات جاڭبىر بولادى. سول جاڭبىردان كەيىنگى وزەننەن سۋ ىشەندەردىڭ ءبارى جىندانادى. بۇگىن جەتى كۇنگە جەتەتىن تازا سۋ الىپ قوي – دەيدى. سودان ماسعۇت پەن پاتشا جەتى كۇندىك سۋلارىن دايىنداپ الادى. ايانداعىداي جاڭبىر بولىپ، جىندى سۋدان ىشكەن بۇتكىل قالا حالقى جىندانادى. ولاردىڭ الدىنا شىعىپ اقىل ايتقان، ەستەرى دۇرىس پاتشا مەن ماسعۇت ءۋازىردى، قالا حالقى:
-مىنا ەكەۋى جىندانعان ەكەن، بۇلاردى ءولتىرۋ كەرەك – دەپ شۋلاسادى. سودان ەستەرى شىققان پاتشا مەن ءۋازىر اقىلداسىپ، ەكەۋى دە جىندى سۋدان مول ءىشىپ الىپ، جىندانىپ قۇتىرىپ ايعايعا باسىپ حالىقتىڭ الدىنا شىعادى. جىندانعان پاتشا مەن ءۋازىردى كورگەن، جىندانعان حالىق:
-اقىلدارىڭىز كىرگەن ەكەن، ءبىزدى كەشىرىڭىزدەر! ايتقاندارىڭىزعا قۇلدىق! – دەپ جالبارىنادى.

ءدال سولاي، ۇرلىققا قۇنىققان جوعارىداعىلار، ۇرلىققا كەسىرى تيەتىن سەندەي «اقىماقتى» ارينە قۋدالايدى. سەن سول 300 ميللياردتىڭ «بولىسكە» تۇسۋىنە كەدەرگى بولماساڭ، وسى كۇنى بىلدەي ءبىر ءمينيستردىڭ كرەسلوسىندا وتىرار ەدىڭ! ناعىز «اقىماق» ەكەنسىڭ!

انەكي، قاراساڭشى! «LTR - ءدىڭ اقىلدىلارى دا»، مادەنيەت مينسترلىگى مەن ءبىلىم مينيسترلىگىندەگى «اقىلدىلار دا» قالتالارىن «قامپايتىپ» شەت ەلگە كەتىپ، سايرانداپ جۇرگەن جوق پا؟ سولار قۇرلى «اقىلىڭ» بولمادى-اۋ! قايتەيىن! قايتەيىن!

ەندى سەنىڭ مىنا پالەدەن قۇتىلۋىڭ ەكى تالاي! سەن سياقتى جەمەيتىن «اقىماقتار» بيلىكتە كوبەيسە، «اقىلدىلار» «مايشەلپەكتەرىنەن» ايرىلارىن جاقسى بىلەدى. سوندىقتان سەنى قالاي دا سوتتاتۋعا جان سالادى. ەندىگى تاعدىرىڭ سوتتىڭ قولىندا.

قازىرگى قوعامنىڭ ۇرانى - "ونەر الدى - كوت قىسقان!"
شىندىقتى ايتساڭ - وشەسىڭ، جاعىمسىنساڭ - وسەسىڭ! وسىنى دا بىلمەدىڭ-اۋ! ءاي، «اقىماق» يسلام باۋرىم-اي!

ايمۇحانبەت بەيسەمبەكوۆتىڭ facebook پاراقشاسىنان

Abai.kz