الەمدىك باسەكەگە قابىلەتتى، جان-جاقتى، ءبىلىمدى ۇرپاق تاربيەلەۋ بارشامىزدىڭ ورتاق مۇددەمىز. وسى رەتتە الماتى قالاسىنىڭ مەملەكەتتىك قۋىرشاق تەاترى ءتۇرلى قويىلىمدارى ارقىلى كىشكەنتاي بۇلدىرشىندەردىڭ بويىنا ادامگەرشىلىك قاسيەتتەردى دارىپتەي وتىرىپ، جاس بۋىننىڭ قالىپتاسۋىنا قالتقىسىز جۇمىس جاساۋدا.

بۇگىنگى كورەرمەندەردىڭ وزىندىك تالاپتارىنا ساي كەلىپ، قىزىعۋشىلىقتارىنا جاۋاپ بەرە الاتىنداي زاماناۋي باعىتتاعى بالالارعا جانە ەرەسەكتەرگە ارنالعان ءتۇرلى سپەكتاكلدەردى ساحنالاپ كەلە جاتقان ونەر ۇجىمى  ۋ.شەكسپيردىڭ ««رومەو مەن دجۋلەتتا»، ش.ايتماتوۆتىڭ «انا – جەر انا»، ەۆريپيدتىڭ «مەدەيا»، ە.يونوۆتىڭ «انا جۇرەگى» سەكىلدى جاڭاشا ۇلگىدەگى قويىلىمدارمەن كورەرمەننىڭ ىستىق ىقىلاسىنا بولەنىپ، حالىقارالىق، رەسپۋبليكالىق قۋىرشاق تەاتر فەستيۆالدەرىندە كاسىبي سىنشىلار تاراپىنان لايىقتى باعاسىن الىپ كەلەدى.  جەڭىس تۇعىرىنا جەتكەن سايىن، جاڭا بەلەسكە ايقىن ماقساتتارمەن تالپىنىپ، شىعارماشىلىعىن شىڭداي ءتۇسۋدى مىندەت سانايتىن تەاتر ءۇشىن ءاربىر جاڭا سپەكتاكلدىڭ جاسالۋى  – مول تاجىريبە، تولاسسىز ءبىلىم.

الماتى مەملەكەتتىك قۋىرشاق تەاترى قازاقتىڭ ۇلى اقىنى، اعارتۋشىسى اباي قۇنانبايۇلى جايىندا سىر شەرتەتىن ءتالىمى بولەك، ءمانى  زور  «مەن ءبىر جۇمباق اداممىن... اباي»  اتتى جاڭا سپەكتاكلدىڭ پرەمەراسىنا شاقىرادى!

ويلى ورتانى تولعاندىرىپ جۇرگەن وقيعالاردى قۋىرشاق بەينەسىندە كورسەتىپ، زاماناۋي تەاتر ستيليستيكاسىندا ساحنالاناتىن سيمۆوليكالىق شەشىمدەرگە تولى سپەكتاكل فانتاسماگوريا جانرىندا جول تارتادى.

ماقسات - اباي تاقىرىبىن كوتەرۋ عانا ەمەس، سول ارقىلى اقىندىقپەن ۇشتالىپ دانالىققا ۇلاسقان كەمەڭگەردىڭ وي-تولعامدارىن كەڭىنەن دارىپتەۋ.

قازاق تەاتر تاريحىندا ۇلى ويشىلدىڭ ءومىرى مەن شىعارماشىلىعىنا ارنالعان سپەكتاكلدەر وسىعان دەيىن دراما تەاترلارىندا ساحنالانعانىمەن، الماتى مەملەكەتتىك قۋىرشاق تەاترى اباي وبرازىن قۋىرشاق بەينەسىندە تۇڭعىش رەت ساحنالاماقشى. سپەكتاكل 16 جاستان جوعارى كورەرمەندەرگە ارنالعان.

رەجيسسەر ا.زايتسەۆ سپەكتاكل ماعىناسىنا ساي دەتالدار ارقىلى، الەۋمەتتىك، قوعامدىق، مورالدىق ماسەلەلەرىن ارقاۋ ەتكەن ولەڭدەرى مەن قارا سوزدەرىنە, سونىمەن قاتار، م.اۋەزوۆتىڭ «اباي جولى» رومانىنا نەگىزدەپ كورسەتۋدى ماقسات ەتكەن. مۇندا تەرەڭ فيلوسوفيا دا، جالپىادامزاتقا ورتاق قۇندىلىقتاردى قادىرلەۋگە جاسالعان قادام دا بار. ءاربىر كورەرمەن قويىلىمنان  وزىنشە وي تۇيەدى.

زامان وزگەرىپ، ونەر مەن ءبىلىمدى جەتكىزۋدىڭ تاسىلدەرى ارقيلى جولعا تۇسكەنىمەن، قۋىرشاق تەاترىنىڭ تۇڭعيىعىندا كورەرمەندەرىنە بەرەر قازىناسى تاۋسىلماق ەمەس. سان قاتپارلى، تامىرى تەرەڭ تاريحىمىزدا اباي سىندى ۇلى اقىننىڭ مۇراسىن ناسيحاتتايتىن سالماقتى سپەكتاكدەردى قۋىرشاق بەينەسىندە كورسەتەتىن باتىل شەشىم قۋىرشاق تەاترىنىڭ جاڭا قىرىنان دامىپ، وركەندەۋىنە ءوز سەپتىگىن تيگىزەرى انىق.  كەمەڭگەر ويشىل، دانا ابايدىڭ اسىل مۇراسىن ساحنالاۋعا جاسالعان قادام ۇلى اقىننىڭ 175 جىلدىعىمەن تۇسپا-تۇس كەلىپ وتىر. سپەكتاكل پرەمەراسى 14-15 قاراشا كۇندەرى، 18:30-دا وتەدى. جاڭالىققا جانى قۇمار بارشا كورەرمەندەرىمىزدى جاڭا قويىلىمنىڭ پرەمەراسىندا كۇتەمىز!

مەملەكەتتىك قۋىرشاق تەاترى

Abai.kz