قر پرەمەر-ءمينيسترىنىڭ ورىنباسارى بەردىبەك ساپارباەۆ جامبىل وبلىسىنا جۇمىس ساپارى بارىسىندا قوعام وكىلدەرىمەن، پەداگوگتار جانە دەنساۋلىق سالاسىنىڭ ماماندارىمەن كەزدەستى.

الدىمەن، ۆيتسە-پرەمەر باستاعان ۇكىمەتتىڭ جۇمىسشى توبى وبلىستىق قازاق دراما تەاترىندا جامبىلدىق ءتۇرلى سالانىڭ ماماندارى مەن قوعام بەلسەندىلەرى مەن ۇكىمەتتىك ەمەس ۇيىمداردىڭ وكىلدەرىمەن كەزدەستى. وندا ب. ساپارباەۆ مەملەكەتتىڭ الەۋمەتتىك-ەكونوميكالىق ساياساتىنداعى ايرىقشا ءمان بەرىلىپ وتىرعان باسىمدىقتارعا توقتالدى. ءوز سوزىندە بۇگىندە تاراز قالاسىنىڭ شىن مانىسىندە كۇن ساناپ تاريحي كەلبەتى ايشىقتالىپ، جاڭعىرىپ كەلە جاتقانىن ايتىپ وتكەن پرەمەر ءمينيستردىڭ ورىنباسارى ەل ۇكىمەتى الدىنداعى اۋقىمدى مىندەتتەردى تىلگە تيەك ەتتى.

تۇرعىنداردىڭ تۇرمىس ساپاسىن جاقسارتۋدىڭ ءبىر جولى - مەديتسينالىق قىزمەتتىڭ قولجەتىمدى بولۋى ەكەنى بەلگىلى. حالىق دەنساۋلىعىن ساقتاۋدا العاشقى دارىگەرلىك كومەكتى ءتيىمدى ۇيىمداستىرۋدىڭ ماڭىزى زور. بۇل رەتتە جامبىل ءوڭىرى جۇمىستى جۇيەلى جۇرگىزىپ، رەسپۋبليكا بويىنشا العا شىعىپ وتىر. وسىنى باسا ايتقان بەردىبەك ساپارباەۆ دەنساۋلىق ساقتاۋ ءمينيسترى ەلجان بىرتانوۆقا ەلدى مەكەندەردى امبۋلاتوريالار جانە مەدپۋنكتتەرمەن قامتۋدا وزگەشە ۇلگى كورسەتىپ، مەملەكەتتىك-جەكەشەلىك ارىپتەستىك تەتىگىن ءتيىمدى پايدالانىپ وتىرعان جامبىل وبلىسىنىڭ تاجىريبەسىن وزگە وڭىرلەرگە تاراتۋدى تاپسىردى.

كەزدەسۋدە ۆيتسە-پرەمەر كەلەر جىلدان باستاپ ەنگىزۋگە ۇسىنىلىپ وتىرعان اتاۋلى الەۋمەتتىك كومەكتىڭ جاڭا جۇيەسى تۋرالى دا ايتىپ ءوتتى.

«شىن مۇقتاج ازاماتتاردى الەۋمەتتىك تۇرعىدا قورعاۋ ءۇشىن ءارى ماسىلدىق پيعىلدى ءورشىتىپ الماۋ ماقساتىندا ۇكىمەت اتاۋلى الەۋمەتتىك كومەكتى تولەۋدىڭ مەحانيزمىن وزگەرتۋدى ۇسىنىپ وتىر. ءبىز ءبىر نارسەنى ءتۇسىنۋىمىز كەرەك. بۇل - اتى ايتىپ تۇرعانداي، اتاۋلى كومەك. جىل بويى تولەنەتىن جالاقى ەمەس. ول قولداۋعا ءزارۋ وتباسىلارعا الەۋمەتتىك جاعدايىن تۇزەپ الۋ ءۇشىن بەلگىلى ءبىر مەرزىمگە تاعايىندالادى. ەكونوميكانى تۇراقتاندىرۋدىڭ جولى - ەڭبەك»، - دەدى بەردىبەك ماشبەكۇلى.

ۇكىمەت باسشىسىنىڭ ورىنباسارى سونداي-اق مۇمكىندىگى شەكتەۋلى جانداردى وڭالتۋ ماقساتىندا بەرىلەتىن ارنايى قۇرىلعىلارمەن قامتۋ جۇيەسىن جاقسارتۋ ءۇشىن ارنايى پورتال اشىلعانىن دا تىلگە تيەك ەتتى. ءتيىستى قۇرال-جابدىقتارعا تاپسىرىس بەرۋگە تەندەر ەڭ ءتيىمدى جول ەمەس ەكەنىن، سونىڭ سالدارىنان بۇعان دەيىن قولداۋدى قاجەت ەتەتىن ازاماتتاردى كەرەك قۇرىلعىمەن قامتۋدا كەدەرگى تۋىنداعانىن ءسوز ەتتى. ارنايى پورتال ەندى وسى تۇيتكىلدەردەن قۇتىلۋعا مۇمكىندىك بەرمەك. جيىندا جۇمىسپەن قامتۋ، بىرىڭعاي الەۋمەتتىك قور جانە بىرىڭعاي الەۋمەتتىك تولەم تۋرالى دا ايتىلدى.

ۆيتسە-پرەمەردىڭ جامبىل جۇرتشىلىعىمەن جۇزدەسۋى ەركىن فورماتتا وتكەنىن ايتا كەتكەن ءجون. تۇرعىندار بەردىبەك ساپارباەۆقا كوكەيدە جۇرگەن سۇراقتارىن قويىپ، وزەكتى ماسەلەلەردى العا تارتتى.

سونداي-اق، قر پرەمەر-ءمينيسترىنىڭ ورىنباسارى بەردىبەك ساپارباەۆ ءوڭىردىڭ پەداگوگ قاۋىمىمەن جۇزدەسىپ، سالاعا قاتىستى بىرقاتار ماسەلەلەردى سارالادى. تاراز قالاسىنداعى №30 مەكتەپ-گيمنازياسىندا وتكەن كەزدەسۋگە وبلىس اكىمى اسقار مىرزاحمەتوۆ، ءبىلىم جانە عىلىم ءمينيسترىنىڭ ورىنباسارى شولپان كارينوۆا قاتىستى. باسقوسۋدا العاش بولىپ ءسوز العان ءبىلىم جانە عىلىم ءمينيسترىنىڭ ورىنباسارى شولپان كارينوۆا سالاداعى وزەكتى ماسەلەلەردى ورتاعا سالىپ، ولاردى شەشۋ باعىتىندا اتقارىلىپ جاتقان جۇمىستاردى تىلگە تيەك ەتتى.

«قازىر رەسپۋبليكاداعى بارلىق مەكتەپتەرى 10-سىنىپقا دەيىن جاڭارتىلعان ءبىلىم بەرۋ جۇيەسىن كوشتى. پەداگوگتەر بۇل جۇيە بويىنشا بىلىكتىلىگىن ارتتىرۋ كۋرستارىنان دا ءوتتى. وزدەرىڭىزگە ءمالىم، ءبىلىم سالاسىنداعى ەڭ وزەكتى ماسەلە «پەداگوگتەر مارتەبەسى تۋرالى» زاڭنىڭ قابىلدانۋى بولىپ وتىر.قازىر بۇل زاڭ جوباسى قازاقستان رەسپۋبليكاسىنىڭ پارلامەنتىنىڭ قاراۋىندا جاتىر. سونداي-اق بيىل پەداگوگتەردىڭ بىلىكتىلىك ساناتىن انىقتاۋ تەستى ۇستازدار قاۋىمىنىڭ ۇسىنىسىنا ساي ەلەكتروندى فورماتتا وتە باستادى»، – دەدى شولپان قاناتقىزى.

ۆيتسە-مينيستر ءوز سوزىندە مەكتەپكە دەيىنگى ءبىلىم بەرۋ مەكەمەلەرىن باعالاۋدىڭ جاڭا جۇيەسى، دۋالدى ءبىلىم بەرۋدى جەتىلدىرۋدىڭ جاي-جاپسارى تۋرالى دا ايتىپ ءوتتى.

ءوز كەزەگىندە بەردىبەك ساپارباەۆ ۇستازدارعا وتاندىق ءبىلىم بەرۋدەگى وزەكتى ماسەلەلەردى شەشۋگە ۇكىمەت تاراپىنان ءتيىستى جۇمىستاردىڭ قولعا الىنعانىن جەتكىزىپ، بۇل ىستە بىرلەسە ارەكەت ەتۋگە شاقىردى. ال كەزدەسۋدى قورىتىندىلاعان وبلىسى اكىمى اسقار مىرزاحمەتوۆ وقۋشىلاردىڭ رۋحاني تانىم-تۇسىنىگىن دامىتۋدى ارنايى ءپاندى وقىتۋ ارقىلى جولعا قويۋ ۇسىنىسىن جەتكىزدى.

ۆيتسە-پرەمەردىڭ وبلىسقا جۇمىس ساپارى وبلىستىق بالالار اۋرۋحاناسىندا تۇيىندەلدى. وندا ب. ساپارباەۆ جامبىلدىق دارىگەرلەر مەن مەديتسينا قىزمەتكەرلەرىمەن كەزدەستى. باسقوسۋ بارىسىندا ەلىمىزدىڭ دەنساۋلىق ساقتاۋ ءمينيسترى ەلجان ءبىرتانوۆ بايانداما جاساپ، مىندەتتى مەديتسينالىق ساقتاندىرۋ باستاماسىنا قاتىستى اتقارىلعان جۇمىستاردى تىلگە تيەك ەتتى. سونداي-اق مينيستر مىندەتتى مەديتسينالىق ساقتاندىرۋ باعدارلاماسىن بۇقاراعا تۇسىندىرۋدە جامبىل وبلىسى الدىڭعى قاتاردا كەلە جاتقانىن جەتكىزىپ، وڭىردەگى جۇمىسقا وڭ باعاسىن بەردى. بايانداما تىڭدالعاننان كەيىن جيىنعا قاتىسۋشىلار مينيسترگە مىندەتتى مەديتسينالىق ساقتاندىرۋعا قاتىستى بىرقاتار ساۋالدارىن قويدى. ول بارلىق ساۋالدارعا تۇششىمدى جاۋاپ بەرىپ، ايماق دارىگەرلەرىن بۇل باعىتتا جۇمىلا جۇمىس جاساۋعا شاقىردى.

كەزدەسۋدى قورىتىندىلاعان بەردىبەك ماشبەكۇلى جامبىل وبلىسىندا اتقارىلىپ جاتقان جۇمىستارعا كوڭىلى تولاتىندىعىن ايتىپ، الايدا الەۋمەتتىك جەلىلەردە دارىگەرلەر تاراپىنا باعىتتالعان سىندارعا ايماقتىڭ اق حالاتتى ابزال جاندارى دەر كەزىندە جاۋاپ بەرمەيتىندىگىنە قىنجىلىس ءبىلدىردى. سول سەبەپتى پرەمەر-ءمينيستردىڭ ورىنباسارى دارىگەرلەرگە سىن مەن ءمىن تاعىلىپ جاتسا، بۇل تۇتاس ەل مەديتسيناسىنا ايتىلعان دۇنيە دەپ قابىلداپ، جۇدىرىقشا جۇمىلۋ قاجەتتىگىن تاپسىردى.

Abai.kz