وتكەن سەنبى كۇنى پاۆلوداردا كەڭەس وداعىنىڭ باتىرى قاناش قامزيننىڭ ەسكەرتكىشىنە گۇل شوقتارىن قويۋ ءراسىمى ءوتتى. ۇستىمىزدەگى جىلى داڭقتى جەرلەسىمىزدىڭ  دۇنيەگە كەلگەنىنە 100 جىل تولىپ وتىر.

باتىردىڭ ەسكەرتكىشىنە گۇل شوقتارىن قويۋ راسىمىنە ونىڭ ۇرپاقتارى دا قاتىستى. قاناش قامزيننىڭ جيەنى پاۆلودارعا ەكىباستۇز قالاسىنان كەلىپ، باتىردىڭ ەسىمىن جادىندا ساقتاعان جەرلەستەرىنە العىسىن ءبىلدىردى.

- مەنىڭ انام گۇلبارام قاناش قامزيننىڭ تۋعان قارىنداسى، - دەدى ول. – ولاردىڭ وتباسىندا سەگىز بالا بولعان. اتا-انالارى بالالارىنا ساپالى تاربيە بەرگەن. مەنىڭ ناعاشىمنىڭ تاعدىرىنا اتا-اناسىنىڭ ونەگەسى اسەر ەتتى دەپ ويلايمىن. ول ۇرپاقتارىنىڭ بەيبىت ءومىرى ءۇشىن ءوز جانىن قۇربان ەتتى. وبلىسىمىزدا باتىر اتامىزعا قۇرمەت كورسەتىلۋى كوڭىل قۋانتادى.

پاۆلودار وبلىسىنىڭ اكىمى بولات باقاۋوۆ تا باتىردىڭ ەسكەرتكىشىنە گۇل شوقتارىن قويدى.

- قازىر ارقايسىمىز قاناش قامزيننىڭ جەڭىستى جاقىنداتۋ ءۇشىن جاساعان ەرلىگىنىڭ باعاسىن سەزىنەمىز، - دەدى ايماق باسشىسى. – ونىڭ ءومىرى جاس ۇرپاق ءۇشىن ونەگە بولىپ قالا بەرمەك. قاناش قامزين وتانعا دەگەن سۇيىسپەنشىلىك پەن ەرلىك ءومىردىڭ سيمۆولىنا اينالدى. ءبىز جەرلەسىمىزدىڭ قاھارماندىعىن  ماقتان تۇتامىز.

قاناش قامزين 1919 جىلى اقسۋ قالاسىنىڭ اۋىلدىق ايماعىنداعى جولقۇدىق اۋىلىندا دۇنيەگە كەلدى. 1941 جىلى اسكەر قاتارىنا شاقىرىلىپ، ستالينگراد جاياۋ اسكەر ۋچيليششەسىندە قىسقا مەرزىمدى كۋرستاردان ءوتتى. ول 429 اتقىشتار پولكىندە روتا كومانديرى بولدى. مولداۆيانى ازات ەتۋ جانە دنەستر وزەنىندەگى شايقاستار كەزىندە ەرلىگىمەن كوزگە ءتۇستى. 1944 جىلعى 14 ءساۋىر كۇنى ۇرىس كەزىندە قازا تاۋىپ، مولداۆيادا جەرلەندى. كسرو جوعارعى كەڭەسى پرەزيديۋمىنىڭ 1944 جىلعى 13 قىركۇيەكتەگى جارلىعىمەن قاناش قامزينگە كەڭەس وداعىنىڭ باتىرى اتاعى بەرىلدى.

Abai.kz