18 قاراشا كەشكىسىن وتكەن وتىرىستا رىسبەكوۆ سۋديادان شەشىم شىعارعاندا ايىپتالۋشىلاردىڭ سوتقا بەلسەندى قاتىسقانىن، كىشكەنتاي بالالارى بارىن ەسكەرۋدى سۇرادى.

پروكۋروردىڭ پايىمداۋىنشا، ايىپتالۋشىلاردىڭ "قدت قوزعالىسىنىڭ جۇمىسىنا ارالاسقانى تولىق دالەلدەنگەن". بۇدان بولەك، رىسبەكوۆ ايىپتالۋشىلاردىڭ "تەرگەۋ كەزىندە قىسىم جاسالدى" دەگەن سوزىنە دە كۇمان كەلتىردى.

سوت كەزىندە ادۆوكات عالىم نۇرپەيىسوۆ سوتقا ەكس-بانكير، قازاقستان بيلىگىن سىناۋشى، 10 جىلدان بەرى شەتەلدە تۇرىپ جاتقان مۇحتار ءابليازوۆتى (قدت قوزعالىسىنىڭ جەتەكشىسى) ۆيدەو ارقىلى قوسىپ، جاۋاپ الۋدى سۇرادى. سۋديا قۇرالاي دارحانوۆا ادۆوكاتتىڭ شاعىمىن قاناعاتتاندىردى، بىراق ءابليازوۆتىڭ سوتقا كەلۋىن تالاپ ەتتى.

ايىپتالۋشىلار تاعىلعان ايىپتاردى مويىندامادى، سوتتان وزدەرىن اقتاۋدى سۇرادى. ادۆوكاتتارى دا ولاردىڭ ءسوزىن قولدادى.

سوت ۇكىمى 19 قاراشادا شىعۋى ءتيىس.

سوتتا ءىسى قارالىپ جاتقان 30 جاستاعى وكسانا شەۆچۋك، 51 جاستاعى گۇلزيپا جاۋكەروۆا، مەن 36 جاستاعى ءانۋار اشىراليەۆ قاماۋدا وتىر. ال 48 جاستاعى جازيرا دەمەۋوۆا كەپىلمەن بوساتىلعان. تامىز ايىندا قازاقستاندىق قۇقىق قورعاۋشىلار جازيرا دەمەۋوۆا، گۇلزيپا جاۋكەروۆا، ءانۋار اشىراليەۆ پەن وكسانا شەۆچۋكتى ساياسي تۇتقىندار تىزىمىنە ەنگىزگەن. قازاقستان بيلىگى ەلدە ساياسي تۇتقىندار بارىن جوققا شىعارادى.

Abai.kz