بۇل اقپاراتتى وقيعا ورنىندا جۇرگەن ازاتتىق ءتىلشىسى حابارلادى.

- 24 ساعات وسىندامىز. كولىك جۋ بار، كاسسا وتكىزۋ بار. تاڭعى ساعات تورتتە تۇرامىز. ءبىر كۇن جوسپار وتكىزبەي كورشى، جۇمىسقا شىعارمايدى. ءبىزدىڭ قادىرىمىز قايدا؟ ايلىعىمىز قايدا؟ ءبىزدىڭ بالا-شاعامىز جوق پا؟ ولاردى قالاي اسىرايمىز؟ - دەيدى كوندۋكتورلاردىڭ ءبىرى.

جۇمىسشىلاردىڭ ايتۋىنشا، جۇمىس بەرۋشى اۋەل باستا 180 مىڭ تەڭگە جالاقى بەرۋگە ۋادە بەرگەن. بىراق "قازىر 60 مىڭ تەڭگەنىڭ ءوزىن ءجوندى الا الا الماي وتىرمىز" دەيدى.

- 179 ساعات جۇمىس ىستەدىم. 16 اۋىسىم. وعان 59 666 تەڭگە شىققان. زەينەتاقىعا 5 666 تەڭگە ۇستادى. تابىس سالىعىن ۇستادى. سوندا 53 مىڭ تەڭگە تازا قولىمىزعا الدىق. وعان قالاي كۇن كورەمىز؟ - دەيدى جۇرگىزۋشى ساكەن ايتۋاروۆ.

نارازى جۇمىسشىلاردىڭ الدىنا كومپانيانىڭ باس ديرەكتورى شىعىپ، "جاعدايدى تۇسىندىرۋگە" تىرىستى. ول جالاقىنى كەشىكتىرىپ جاتقانىن راستاپ، كومپانيانىڭ جاعدايى كۇردەلى ەكەنىن ايتتى.

- مارشرۋتتاردىڭ 70 پايىزى ءوزىن-ءوزى وتەمەيدى. مۇنى جۇمىسشىلاردىڭ ءبارى بىلەدى. بۇلاردىڭ ايلىقتارىنا جەتپەيدى. بىراق سوعان قاراماستان كەشىكتىرىپ بەرىپ جاتىرمىز، - دەدى Shymkent Bus اۆتوپاركىنىڭ ديرەكتورى ەلىكباي توقبەرگەنوۆ.

جۇمىسشىلار ەرەۋىلىن پوليتسيا باقىلاپ تۇر. Shymkent Bus اۆتوپاركىنىڭ جۇمىسشىلارى تامىز ايىندا دا جالاقىنى ۋاقىتىندا الا الماعانىن ايتىپ، نارازىلىق بىلدىرگەن.

Shymkent Bus اۆتوپاركىندە جالپى 480 جۇمىسشى بار. كومپانيا شىمكەنت قالاسىندا 12 باعىت بويىنشا جولاۋشىلاردى تاسيدى.

Shymkent Bus كومپانياسى بيىل 19 ماۋسىمدا جۇمىسىن باستاعان. كومپانيانى اشقان شىمكەنتتىڭ ەكس-اكىمى عابيدوللا ءابدىراحىموۆ قالاعا 300 جاڭا اۆتوبۋس كەلگەنىن حابارلاعان.

Abai.kz