بەيسەنبى، 21 قاراشادا كرەملدە نەنوكسا پوليگونىندا قازا تاپقان ادامداردىڭ تۋىستارىنا "ەرلىك" وردەنىن تاپسىرعان پۋتين اپات جونىندە تۇسىنىكتەمە بەردى. ول پوليگوندا ناقتى قانداي قارۋ سىناقتان وتكەنىن ايتپادى. بىراق "رەسەيدىڭ قاۋىپسىزدىگىن ونداعان جىل قامتاماسىز ەتەتىن الەمدە تەڭدەسى جوق قارۋ" دەپ سيپاتتادى. ءپۋتيننىڭ سوزىنشە، "ۋنيكالدى تەحنولوگيا الەمدە بەيبىتشىلىكتى ساقتاۋعا كەپىلدىك بەرەدى".

بۇعان دەيىن رەسەي پرەزيدەنتى "بولاشاعى زور" قارۋ جۇيەسىمەن جۇمىس بارىسىندا جارىلىس بولعانىن ايتقان. قورعانىس مينيسترلىگى جارىلىس راديويزوتوپتى ەنەرگيا كوزىنەن شىقتى دەپ حابارلادى.

ازاتتىقتىڭ ورىس قىزمەتى جانە وزگە بىرقاتار باق اشىق دەرەكتەرگە سۇيەنە وتىرىپ، جارىلىس سەبەپتەرى جايلى بولجام جاريالاعان. قازان ايىندا اقش مەملەكەتتىك دەپارتامەنتى رەسەيدىڭ ارحانگەلسك وبلىسىنداعى پوليگوندا بولعان جارىلىس اق تەڭىزدىڭ تۇبىنەن يادرولىق قوندىرعىسى بار "بۋرەۆەستنيك" زىمىرانىن الىپ شىعۋ كەزىندە بولعان دەگەن قورىتىندى جاسادى.

تامىزدىڭ 8-ىنە بولعان جارىلىستا "روساتومنىڭ" بەس قىزمەتكەرى، ەكى اسكەري قىزمەتكەر قازا بولىپ، بىرنەشە ادام جارالاندى. ولاردىڭ كەيبىرىنە رادياتسيا ساۋلەسى وتكەنى حابارلاندى. سەۆەرودۆينسكىدەگى جارىلىستان سوڭ ايماقتا رادياتسيا دەڭگەيى 16 ەسەگە ۇلعايىپ، قالپىنا تۇسكەن.

Abai.kz