وسك باستاماشىل توپتىڭ رەفەرەندۋم تۋرالى وتكىزۋ ۇسىنىسىن، جينالىستىڭ حاتتاماسىن 21 قاراشادا قابىلداپ العان.

وسك شەشىمىندە "رەفەرەندۋم وتكىزگىسى كەلگەن ازاماتتار زاڭعا سايكەس جۇمىس ىستەگەنىن، الايدا 10 قاراشادا نۇر-سۇلتان قالاسىندا باستاماشىل توپتىڭ جينالىسىنا ءتيىستى دەلەگاتتار تالاپقا ساي جينالماعان. قالا اكىمدىگىنىڭ دەرەگىنشە، جيىنعا بارلىعى 279 دەلەگات قاتىسقان. تالاپ بويىنشا، ءاربىر وبلىستان، رەسپۋبليكالىق ماڭىزى بار قالالاردان كەم دەگەندە 510 دەلەگات قاتىسۋى كەرەك" دەپ جازىلعان.

جيىندى وتكىزگەن باستاماشىل توپ جيىنعا 558 ادام كەلگەنىن مالىمدەگەن ەدى.

ورتالىق سايلاۋ كوميسسياسى شەشىم شىعارعاندا كەيبىر باق-تىڭ باستاماشىل توپ جينالىسى جايلى تاراتقان اقپاراتىنا "سۇيەنگەنىن" العا تارتادى..

"Vlast.kz سايتى قاتىسۋشى سانىن 300-دەي دەپ كورسەتكەن. ازاتتىق راديوسىنداعى رەپورتاجدا قاجەتتى كۆورۋمنىڭ جوقتىعىنا نارازىلىق بىلدىرگەندەردىڭ بولعانى ايتىلعان" دەپ مالىمدەدى وسك قاۋلىسىندا.

باستاماشىل توپ ون كۇن ىشىندە جوعارعى سوتقا شاعىمدانۋعا قۇقىلى.

10 قاراشادا نۇر-سۇلتاندا ءبىر توپ بەلسەندى جيىن وتكىزىپ، "سايلاۋ تۋرالى" جانە "ساياسي پارتيالار تۋرالى" زاڭدى وزگەرتۋ ءۇشىن رەفەرەندۋم وتكىزۋ ماسەلەسىن تالقىلاعان. نۇر-سۇلتانداعى جيىندا بەلگىسىز ءبىر ادام "جينالىستىڭ زاڭدىلىعىنا كۇمان كەلتىرىپ", داۋلاسقان ەدى. جيىنعا نارازىلىق بىلدىرگەن قاتىسۋشىنى زالدان كۇشتەپ شىعارعان.

Abai.kz