بۇقارانىڭ بيلىككە، مەملەكەتتىڭ رەفورمالارىنا، ءتىپتى «جارقىن بولاشاققا» قالاي سەنەتىنىن زەينەتاقى قورىنداعى ءار ەسەپ-شوتتاعى اقشا دالەلدەپ تۇر-اۋ.

پرەمەر-مينيستر اسقار مامين قورداعى 5,3 ملن شوتتىڭ ارقايسىسىندا 500 مىڭعا جەتپەيتىن قارجى جاتقانىن ايتىپتى. ال 1,6 ملن شوتتا 500 مىڭنان 1 ملن تەڭگەگە دەيىن جينالىپتى. ءسويتىپ 6,9 ملن شوتتىڭ ارقايسىسىندا 1 ملن تەڭگەگە دەيىن اقشا جينالعان. زەينەتاقى جۇيەسىندە بارلىعى 10 ملن 620 مىڭنان شاماسىندا ەسەپ-شوت بار دەيدى. ولاردىڭ تەك 26 پايىزىندا عانا 1 ملن-نان 5 ملن تەڭگەگە دەيىن قارجى جينالىپتى.

ەندى ەسەپتەپ كورەيىك. 500 مىڭ تەڭگەگە دەيىن قارجى جينالعان 5,3 ملن شوت دەگەنىڭىز شامامەن سونشا ادام. 500 مىڭ تەڭگەنى ايىنا 40 مىڭ تەڭگە جالاقى الاتىن ادام 10 جىلدا، 20 مىڭ تەڭگە جالاقى الاتىن ادام 20 جىلدا جينايدى. ارينە ينۆەستيتسيالىق تابىس، اناۋ-مىناۋ دەگەن ۇستەمەلەر بار. بىراق، ول ەشتەڭە وزگەرتە قويمايدى. دەمەك ون جىل بويى نەبارى 40 مىڭ تەڭگە جالاقى الىپ كەلگەندەر سانى 5,3 ملن شاماسىندا بولىپ تۇر.

ارينە سەنۋ قيىن. بىراق زەينەتاقى جارناسىنىڭ جاعدايى وسىنداي. مەنىڭشە بۇل بۇقارانىڭ ەلدەگى ءتۇرلى رەفورمالار مەن باستامالارعا سەنە قويمايتىنىن بايقاتاتىن سياقتى. بالكىم سودان دا شىعار جارنا اۋدارۋعا قۇلىقتى بولمايتىندار جۇمىسشىلاردىڭ دا، جۇمىس بەرۋشىلەردىڭ دە اراسىنان تابىلادى. جيناقتاۋشى زەينەتاقى جۇيەسىنە سەنبەيتىندەر جۇمىس بەرۋشىمەن كەلىسىپ، از قارجى اۋدارتاتىن ءتاسىل بار. قورعا بىرنەشە مىڭ تەڭگە اۋدارعانشا، ونىڭ قالتاسىندا قالعانىن جاقسى كورەدى. جۇمىس بەرۋشىلەر دە زەينەتاقى جارناسىن ىقىلاسپەن تولەپ تۇرۋعا تىم قۇلىقتى ەمەس ءتارىزدى. ەندى وسى قورداعى جيعان-تەرگەندى ءۇي الۋ ءۇشىن قولدانۋ مۇمكىندىگىمىز ازايىپ قالدى.

500 مىڭ تەڭگە ءۇي تۇگىلى نەسيگە لادا-گرانتا الساڭىز، سونىڭ العاشقى جارناسىنا ارەڭ جەتەدى. (ارينە لادانىڭ باستاپقى جارناسى شامامەن 320-350 مىڭ شاماسىندا، ونىڭ وزىندە 10 پايىز جارنا بولسا عانا. ال 20 پايىز بولسا 500 مىڭ جەتپەيدى).

ايتپاقشى، زەينەتاقى شوتتارىنداعى قارجى ءبىر جاعىنان ەلدەگى الەۋمەتتىك جاعدايدى سيپاتتاۋى مۇمكىن. جىلدار بويى جيناعان جارناسى 500 مىڭ تەڭگەگە ارەڭ جەتكەن ازاماتتار سانى 5 ملن-نان اسسا، وندا كەدەيشىلىكتى جويۋعا باعىتتالعان شارالاردان قايىر بولمادى دەگەن ءسوز.

دامىپ جاتقانىمىز، جالپى ىشكى ءونىم مولشەرى جان باسىنا شاققاندا 9 مىڭ دوللاردان اسقانى جايلى دەرەكتەر ميفكە ۇقساپ كەتەتىن ءتارىزدى. الدە زەينەتاقى قورىنداعى قارجىنى بىزگە بىلدىرمەي جىمقىرىپ جۇرگەندەر بار ما؟ ايتەۋىر 5,3 ملن شوتتىڭ ارقايسىسىندا 500 مىڭعا ارەڭ جەتەتىن سوما جينالعانى جايلى اقپارات انىق. ءسويتىپ، جيعان-تەرگەنىمىز ءبىر بولمەلى پاتەردىڭ العاشقى جارناسىنا جارامايتىنىنا كوزىمىز ابدەن جەتتى. وسىنداي ازعانا تيىن-تەبەن جينالعان شوتتارداعى قارجىنى ءۇي الۋعا العاشقى جارنا رەتىندە پايدالانۋعا مۇمكىندىك بەرۋ ءۇشىن ۇكىمەت قانداي تەتىك ويلاپ تابار ەكەن، سول قىزىق بولىپ تۇر. الدە زەينەتاقى جارناسىن تەك 1-5 ملن تەڭگە جيناعان 26 پايىز سالىمشى عانا ءۇي الۋعا پايدالانا ما؟

5 ملن تەڭگە جارنا جيناعان ادام ورتا ەسەپپەن ون جىل بويى ايىنا 400 مىڭ تەڭگە نەمەسە 20 جىل بويى 200 مىڭ تەڭگەگە جۋىق جالاقى الىپ وتىرۋى كەرەك. ال مۇنداي ازاماتتار ءۇيدى شەكەسىنەن شەرتىپ ءجۇرىپ، ساتىپ الۋعا قاۋقارلى كەلەدى.

امانگەلدى قۇرمەتۇلىنىڭ الەۋمەتتىك جەلىدەگى پاراقشاسىنان

Abai.kz