ادۆوكات جانار بالعاباەۆانىڭ ايتۋىنشا، جوعارعى سوتتىڭ 2015 جىلى 6 قازاندا شىعارعان نورماتيۆتىك قاۋلىسىنا سايكەس، شارتتى تۇردە مەرزىمىنەن بۇرىن بوساپ شىعۋ ءۇشىن ەكى شارت ورىندالۋى ءتيىس: ورەسكەل زاڭبۇزۋشىلىق جانە شاعىم بولماۋى كەرەك.
"جانبولاتتا ورەسكەل زاڭبۇزۋشىلىق تا، ونىڭ ۇستىنەن تۇسىرىلگەن شاعىم دا جوق. بۇعان قوسا، پروباتسيا قىزمەتى وعان جاعىمدى مىنەزدەمە بەردى. بىراق سوعان قاراماستان سوت ءوتىنىشىن قاناعاتتاندىرمادى" دەدى جانار بالعاباەۆا ازاتتىق تىلشىسىنە.
ادۆوكاتتىڭ ايتۋىنشا، سوت مامايدىڭ جۋرناليستىك قىزمەتىنە بايلانىستى بۇرىن جاساعان ەسكەرتۋىنە سۇيەنە وتىرىپ، سونداي شەشىم شىعارعان.
ازاتتىق ءتىلشىسى 26 قاراشادا قاراساي اۋداندىق سوتىنا حابارلاسقانمەن جاۋاپ الا المادى.
ءساۋىر ايىندا دا سوت جانبولات مامايدىڭ شارتتى تۇردە مەرزىمىنەن بۇرىن بوساتۋ تۋرالى ءوتىنىشىن قاناعاتتاندىرماعان.
2017 جىلى اقپاندا "مۇحتار ءابليازوۆتىڭ اقشاسىن گازەت شىعارۋ ارقىلى زاڭداستىرۋعا قاتىستى" دەگەن كۇدىكپەن الماتىدا قاماۋعا الىنعان جانبولات ماماي جەتى ايدان كەيىن، 7 قىركۇيەكتە سوت ۇكىمىمەن بوستاندىعى ءۇش جىلعا شەكتەلىپ، بوساپ شىققان. سوت وعان ءۇش جىل جۋرناليستىك قىزمەتپەن اينالىسۋعا تىيىم سالعان. جانبولات ماماي وزىنە تاعىلعان ايىپتى مويىنداماعان.
قازان ايىندا "قازاقستاننىڭ دەموكراتيالىق پارتياسىن" قۇرۋ تۋرالى باستاما كوتەرگەن جانبولات ماماي وبلىستى ارالاۋعا پروباتسيا قىزمەتىنىڭ رۇقسات بەرمەي وتىرعانىن حابارلاعان. ونىڭ ايتۋىنشا، پارتيا قۇرۋ تۋرالى باستاما كوتەرگەننەن كەيىن پروباتسيا قىزمەتى بۇرىنعىداي ايىنا ءبىر رەت ەمەس - ءتورت رەت تىركەلۋدى مىندەتتەگەن. بۇعان دەيىن قاراساي اۋداندىق پروباتسيا قىزمەتى ازاتتىققا تەلەفون ارقىلى سۇحبات بەرۋدەن باس تارتقان.
Abai.kz
