سارسەنبى كۇنى كوميتەت باسشىسى دجەررولد نادلەر اق ۇيگە حات جازىپ، ترامپتى 4 جەلتوقسانعا تىڭداۋعا شاقىردى. پرەزيدەنت بۇل شاقىرۋدى قابىل الىپ، ءوزى نە زاڭگەرىن جىبەرۋى مۇمكىن.

حاتتا جازىلعانداي، جينالىستا ترامپقا يمپيچمەنت جاريالاۋعا كونستيتۋتسيالىق نەگىز بار-جوعىن تالقىلايدى. بۇل ءۇشىن كونگرەسسكە كونستيتۋتسيالىق قۇقىق بويىنشا زاڭگەرلەر مەن ساراپشىلار شاقىرىلعان.

ازىرگە ترامپ كونگرەسستىڭ شاقىرۋى بويىنشا پىكىر بىلدىرمەدى. ول وسىعان دەيىن تەرگەۋ ءىسىن سىناپ كەلگەن.

زەرتتەۋ ماتەريالدارىنىڭ زاڭ كوميتەتىنە بەرىلۋى — يمپيچمەنت ءىسى بويىنشا تەرگەۋدىڭ اياقتاپ قالعانىنان حابار بەرەدى. ەندى كوميتەت بۇل ىسكە باعا بەرىپ، ەگەر ترامپ قىزمەتتەن الىنۋعا لايىقتى دەپ تاپسا، يمپيچمەنت بابىن ازىرلەيدى. ودان كەيىن وكىلدەر پالاتاسىنا داۋىس بەرۋگە الىپ شىعادى.

ترامپ 2020 جىلى وتەتىن پرەزيدەنت سايلاۋىندا ىقتيمال باسەكەلەسى دجو بايدەنگە زيان كەلتىرۋ ءۇشىن ۋكراين پرەزيدەنتىنە قىسىم جاسادى دەپ ايىپتالىپ جاتىر.

Abai.kz