ۇلتتىق كومپانيا ۇستىمىزدەگى جىلدىڭ توعىز ايىندا 1,162 ترلن تەڭگە سالىق تولەپتى. ول بىلتىرعى جىلدىڭ 9 ايىمەن سالىستىرعاندا 11%-عا ارتىق. بۇل تۋرالى «قازمۇنايگاز» ءۇش توقساننىڭ قورىتىندىسى بويىنشا ەسەبىندە حابارلادى.

برەنت مۇنايىنا باعانىڭ قۇبىلىپ تۇرۋى جانە KMG International-دىڭ ساتۋ كولەمىنىڭ ازايۋى سالدارىنان تابىستىڭ ءبىر بولىگىنەن (1,9%) ايىرىلۋ سياقتى سىرتقى نارىقتاعى كەدەرگىلەر قاراماستان، «قازمۇنايگازدىڭ» قارجىلىق جاعدايى تۇراقتى. گازدى قىتايعا ەكسپورتتاۋ كولەمىنىڭ ارتۋى جانە تەڭگەنىڭ السىرەۋىنىڭ ارقاسىندا ۇلتتىق كومپانيا ەسەسىن جىبەرگەن جوق. توعىز ايدىڭ قورىتىندىسى بويىنشا ءتۇسىم 5,1 ترلن تەڭگەنى قۇرادى. كومپانيانىڭ تازا تابىس – 800 ملرد تەڭگەگە جاقىنداپ قالدى. بۇل 2018 جىلدىڭ توعىز ايىمەن سالىستىرعاندا 22,5%-عا ارتىق.

سونىمەن قاتار، ەسەپتى كەزەڭنىڭ ماڭىزدى جاڭالىقتارىنىڭ ءبىرى رەتىندە «قازمۇنايگازدىڭ» تەڭىزشەۆرويل مۇنايىنا اۆانس بەرۋ شەڭبەرىندەگى مىندەتتەمەلەرىن 1 846 ملن. اقش دولل. سوماسىندا مەرزىمىنەن بۇرىن ورىنداعانى، سونىڭ ىشىندە 1 270 ملن. اقش دولل. سوماسىن جەدەلدەتىپ وتەۋى تۋرالى مالىمدەلدى. ايتا كەتەيىك، 2016 جىلى ۇلتتىق كومپانيا حالىقارالىق ترەيدەرلەرمەن تەڭىزشەۆرويلدىڭ شيكى مۇنايى مەن سۇيىتىلعان گازىن جەتكىزىپ بەرۋ تۋرالى ۇزاق مەرزىمدى كەلىسىمگە وتىرعان بولاتىن.

جالپى، «قازمۇنايگازدىڭ» قارجىلىق جاعدايى حالىقارالىق رەيتينگتىك اگەنتتىكتەردىڭ باياندامالارىندا ايقىندالعان. اتاپ تايقاندا، Fitch اگەنتتىگى ۇلتتىق كومپانيانىڭ رەيتينگىسىن «ۆۆۆ-/بولجام تۇراقتى» دەڭگەيىندە راستادى. بۇل رەتتە اگەنتتىك جەكە رەيتينگتىڭ (stand-alone credit profile) «b» دەڭگەيىنەن «bb-» دەڭگەيىنە دەيىن كوتەرىلگەنىن اتاپ ءوتتى. ال Moody's حالىقارالىق رەيتينگ اگەنتتىگى قازاقستان ۇكىمەتى تاراپىنان قولداۋدى ەسەپتەمەگەندە، دەربەس نەگىزدەگى «قازمۇنايگازدىڭ» كرەديت قابىلەتتىلىگى رەيتينگىن «ۆا3»-تەن «ۆا2»-گە دەيىن كوتەردى. قمگ ۇزاق مەرزىمدى رەيتينگى «تۇراقتى» بولجامىنان «ءپوزيتيۆتى» بولجامىنا قايتا قارالىپ، «ۆاا3» دەڭگەيىندە راستالدى.

ەسەپكە سۇيەنسەك، ۇلتتىق كومپانيانىڭ ادىمى ازىرگە جامان ەمەس. قارجىلىق جاعداي تۇراقتى، وندىرىستىك كورسەتكىشتەر جوسپارعا سايكەس. ەندى 2019 جىلدى قانداي ناتيجەمەن اياقتايتىنىن كورە جاتارمىز.

Abai.kz