زاڭنىڭ ءماتىنى جاقىن ارادا باسپاسوزگە جاريالانادى.
جەمقورلىققا قارسى ءىس-قيمىل اگەنتتىگىنىڭ حابارلاۋىنشا، ەندى "مەملەكەتتىك قىزمەتكەرلەر: مينيسترلەر، ولاردىڭ ورىنباسارلارى، نۇر-سۇلتان، الماتى، شىمكەنت قالاسى، اۋدان اكىمدەرى مەن ولاردىڭ ورىنباسارلارى وزدەرىنە تىكەلەي باعىناتىن قىزمەتكەرلەرى پارامەن ۇستالسا، وتستاۆكاعا كەتۋگە ارىز جازۋى ءتيىس".
اگەنتتىكتىڭ دەرەگىنشە، مىسالى مينيسترگە "تىكەلەي باعىناتىن تۇلعالار" قاتارىنا ءمينيستردىڭ ورىنباسارى، جاۋاپتى حاتشىسى نەمەسە اپپارات جەتەكشىسى، وبلىستىق ءبولىم جەتەكشىلەرى كىرەدى، وبلىس، رەسپۋبليكالىق ماڭىزى بار قالا مەن استانا اكىمدەرى ءۇشىن - ونىڭ ورىنباسارى، اپپارات جەتەكشىلەرى كىرەدى. "مەملەكەتتىك قىزمەت" تۋرالى زاڭعا سايكەس، وتستاۆكاعا كەتۋ تۋرالى ءوتىنىشتى شەنەۋنىك ءوزىن تاعايىنداعان لاۋازىمدى تۇلعاعا بەرۋى ءتيىس.
"وتستاۆكانى قابىلداۋ نەمەسە قابىلداماۋ – بۇل ساياسي
قىزمەتكەردى قىزمەتكە تاعايىنداعان ادامنىڭ قۇزىرەتى. ەگەر ساياسي ەمەس، بىراق ا جانە ب كورپۋسىنىڭ اكىمشىلىك مەملەكەتتىك
قىزمەتكەرلەرىنە تىكەلەي باعىناتىن قىزمەتكەرلەر جەمقورلىق جاساسا، الدىڭعىلارعا تارتىپتىك جاۋاپكەرشىلىك قاراستىرىلعان" دەلىنگەن حابارلامادا.
توقاەۆ بيىل مامىردا "مەملەكەتتىك ورگان باسشىلارى قول استىنداعى قىزمەتكەرلەرى جەمقورلىقپەن بابىمەن كىنالى دەپ تانىلسا، وتستاۆكاعا كەتۋى كەرەك" دەگەن.
قازاقستاندا شەنەۋنىكتەر، مەملەكەتتىك ورگان قىزمەتكەرلەرىنىڭ "جەمقورلىق" بابى بويىنشا ۇستالعانى تۋرالى اقپارات ءجيى جاريالانادى. بۇعان دەيىن "پارامەن ۇستالعان، قىزمەتىن اسىرا پايدالانعان، اقشا جىمقىرعان" ونداعان شەنەۋنىك ايىپپۇل تولەگەن نەمەسە مەرزىمىنەن بۇرىن قاماۋدان شىققان.
قازاقستاننىڭ بۇرىنعى پرەزيدەنتى نۇرسۇلتان نازارباەۆ تا بۇعان دەيىن ەلدە جەمقورلىقپەن كۇرەسۋدى كۇشەيتۋ جايلى بىرنەشە رەت ايتقان. توقاەۆ تا سوڭعى ۋاقىتتا بيۋدجەت قارجىسىن جىمقىرعانداردى، پارا العانداردى جازالاۋ جايلى جيى ايتىپ ءجۇر. بۇعان قاراماستان قازاقستان جەمقورلىق يندەكسىندەگى جاعدايى جاقسارعان جوق.
Transparency International ۇيىمى جىل سايىن جاسايتىن جەمقورلىقتى قابىلداۋ يندەكسىندە (CJI) قازاقستان ءبىر جىل ىشىندە ەكى ساتى تومەندەگەن. 2018 جىلى 122-ورىندا تۇرعان قازاقستان بيىل قاڭتاردا شىققان ۇيىم رەيتينگىندە 124-ورىنعا تۇسكەن.
Abai.kz
