بۇگىن الماتى وبلىسى اقسۋ اۋداندىق سوتىندا قىتاي جۇمىسشىلارىن سوققىعا جىقتى دەپ ايىپتالعان بەز  ازاماتقا قاتىستى كەزەكتى سوت وتىرىسى ءوتتى. بىراق ەكىنشى رەت ءوتىپ وتىرعان سوت وتىرىسى تاعى دا كەيىنگە قالدىرىلدى. بۇل جولى دا قىتايلىق جابىرلەنۋشىلەر سوتقا كەلگەن جوق. وسىعان بايلانىستى، ادۆوكات تولەگەن بەرلىقوجا قىلمىستىق ءىس جۇرگىزۋ كودەكسىنىڭ 382-بابى، 3-بولىمىنە سايكەس ءىستى قىسقارتۋ تارتىبىمەن قاراۋدى سۇرادى. مەملەكەتتىك ايىپتاۋشى مەن سوتتالۋشىلاردىڭ كەلىسىمىن العان سۋديا بۇل ءوتىنىشتى قابىل الىپ، كەلەسى وتىرىستى ەرتەڭگە بەلگىلەدى.

"جەتىسۋ" گازەتىنىڭ جازۋىنشا، ايىپتالىپ وتىرعان بەس ازامات پروكۋرورمەن پروتسەسسۋالدىق كەلىسىم جاساسقان. قولداۋ ءبىلدىرۋ ءۇشىن ارنايى كەلگەن بەلسەندىلەر سوتتالۋشىلار مىنگەن كولىكتىڭ جولىن بوگەپ، ازاماتتاردى بوساتۋدى جانە سوتتىڭ سول ساتتە ءوتۋىن تالاپ ەتكەن. نارازىلىقتىڭ ارتى تولقۋعا ۇلاساۋى مۇمكىن دەپ قاۋىپتەنگەن ارنايى جاساق تا كەلىپ، جاعدايدى باقىلاپ تۇردى. قوعام قايراتكەرى رىسبەك سارسەنباي مەن اقسۋ اۋداندىق پروكۋرورىنىڭ ورىنباسارى ادىلەت اسقارۇلى پوليتسەيلەردىڭ كولىگىنىڭ ۇستىنە شىعىپ، حالىقتى سابىرعا شاقىردى.

- باۋىرلارىم، ءسال سابىر ەتىڭىزدەر! اقىل كەرەك. ءبىز حالىقپىز، وسىنشا ادام جينالىپ تۇرعانىنا ءبىز ريزامىز. ەل بار، قازاق دەگەن حالىق بار ەلدىڭ نامىسىن قورعايتىن. بەس باتىر بولسا، بەس باتىردىڭ ارتىندا بەس مىڭ، بەس ءجۇز مىڭ، بەس ميلليون حالىق بار. بيلىكتىڭ كوزىن جەتكىزدىك ءبىز. قازىر ءسال سابىر ەتىڭىزدەر. زاڭ بار، ءتارتىپ بار. تارتىپكە باعىنۋىمىز كەرەك. مەن سىزدەردىڭ اتتارىڭىزدان تالاپ قويدىم. سوت پروتسەسسىن سوزباسىن. سۋديا ەرتەڭگە قالدىرىپ وتىر، سوعان كەلىسپەي وتىرمىز. سولاي عوي؟ سوندىقتان، ءبىزدىڭ تالابىمىز، سوت پروتسەسسىن قايتا باستاسىن. قازىر ءبىز قايتادان ءوتىنىش جاسايمىز. جىگىتتەردى ەركىندىككە كەپىل ارقىلى، نە بولماسا قولحات ارقىلى، نە بولماسا ۇيقاماق ارقىلى بوستاندىققا شىعارۋىن تالاپ ەتەمىز. جابىرلەنۋشىلەردى كەلتىرسىن. سوت پروتسەسىن قىسقارتسىن، - دەدى رىسبەك سارسەنباي.

ودان كەيىن اۋداندىق پروكۋروردىڭ ورىنباسارى ادىلەت اسقارۇلى:

- جەرلەستەر، بارلىقتارىڭىز بىلەسىزدەر. جاڭا ەستىدىڭىزدەر، سوت پروتسەسىن ەرتەڭگە قالدىرۋعا كەلىسىلدى. ۋاقىت كەرەك. ەرتەڭ ۇشتەگى سوت پروتسەسىننەن سوڭ جىگىتتەر سوت زالىنان بوساتىلادى. سوندىقتان، رىسبەك اعا ايتقانداي، زاڭعا باعىنايىق، قوعامدىق ءتارتىپتى بۇزبايىق. شىدامدىلىق تانىتايىق، كەلىستىك پە؟ ءبىزدى دە تۇسىنىڭىزدەر. ەرتەڭ ساعات ۇشتە پروتسەستىك كەلىسىم بەكىتىلگەننەن كەيىن جىگىتتەر سوت زالىنان بوساتىلادى، - دەدى.

سوت پروتسەسسىن سۋديا جادىرا زارىقپاەۆا جۇرگىزىپ جاتىر. جەلتوقساننىڭ 20-دا وتكەن العاشقى وتىرىسقا 100- گە جۋىق ادام جينالىپ، زالعا سىيماعاندىقتان مونيتور ارقىلى باقىلاعان بولاتىن. ايتا كەتۋ كەرەك، 2 وتىرىسقا دا جابىرلەنۋشى قىتاي ازاماتتارى كەلگەن جوق. قورعاۋشى تولەگەن بەرلىقوجا باستاعان سوتتالۋشىنىڭ جاقتاستارى سۋدياعا بىرنەشە ءوتىنىش جاساعان. ولاردىڭ نەگىزگىسى سوتتالۋشىلاردى كەپىلمەن بوساتۋ جانە ۇيقاماققا جىبەرۋ. دەگەنمەن، سۋديا، ازىرگە بۇل وتىنىشتەردى قاناعاتتاندىرعان جوق.

فوتو: 7-su.kz

Abai.kz