قر ىشكى ىستەر ءمينيسترى
ەرلان تۇرعىنباەۆتىڭ نازارىنا!

قازىرگى تاڭدا قانداستارىمىزدان ۋاقىتشا تىركەۋگە الىنىپ تاستالدى. كەرىسىنشە، قازاقستان رەسپۋبليكاسىنىڭ ازاماتتىعىن الۋ ءۇشىن قۇجات تاپسىرعاندا، قانداستارىمىزدان تۇراقتى تىركەۋگە تۇرۋ – شارت!

قازاقستان رەسپۋبليكاسى ىشكى ىستەر ءمينيسترىنىڭ 2015 جىلعى 4 جەلتوقسانداعى №992 بۇيرىعىنىڭ 10-تارماعى، 8-تارماقشاسىندا تۇراقتى تىركەۋگە تۇرۋدا ىشكى ىستەر ورگاندارىنا ۇسىناتىن  قۇجاتتاردىڭ تىزبەسىندە «ءوتىنىش بەرۋشىگە تۇرۋعا تۇرعىن ءۇي ۇسىنۋ جانە تۇراقتى تىركەۋ ەسەبىنە قويۋ تۋرالى جەكە جانە زاڭدى تۇلعامەن نوتاريالدى كۋالاندىرىلعان شارت نە نوتاريالدى كۋالاندىرىلعان كەلىسىم;» دەپ، جازۋلى تۇر.

جاڭادان كوشىپ كەلگەن قانداستارىمىزدىڭ ءوز اتىندا باسپانا بولماعاندىقتان، اقشا بەرىپ بولسا دا وزگە بىرەۋدىڭ ۇيىنە نوتاريالدى كۋالاندىرىلعان كەلىسىم-شارتپەن ەسەپكە تۇرادى. بىراق، ول قانداس ءىس-جۇزىندە ول ۇيدە تۇرمايدى. باسقا جەردەن پاتەر جالداپ كۇنەلتە تۇرادى. ايتپاقشى،  ىشكى ىستەر ءمينيسترىنىڭ ءبىر ادام ءۇشىن 15 شارشى مەتر دەگەن بەلگىلەمەسى تاعى بار. ودان اسىپ كەتسە، ول ۇيگە تىركەۋگە المايدى. «ءبىر» دەپ قويىڭىز!

قانداستىرىمىز وزگە ۇيگە تۇراقتى تىركەۋگە تۇرىپ، ىقتيارحاتقا نەمەسە قازاقستان رەسپۋبليكاسىنىڭ ازاماتتىعىنا قۇجات تاپسىرىپ قويعان سوڭ، جەرگىلىكتى پوليتسيا دەپارتامەنتى مەن باسقارمالارى قىزمەتكەرلەرىنىڭ  «وپەراتيۆتىك تەكسەرۋى» باستالادى.

«ءسىز تىركەلگەن مەكەنجايدا تۇرمايدى ەكەنسىز!» دەپ، قانداستارىمىزدى قۋدالاپ، اكىمشىلىك جازاعا تارتۋ تۋرالى حاتتاما تولتىرا باستايدى.

قازاقستان رەسپۋبليكاسىنىڭ «اكىمشىلىك قۇقىق بۇزۋشىلىق تۋرالى» كودەكسىنىڭ «شەتەلدiكتiڭ نەمەسە ازاماتتىعى جوق ادامنىڭ قازاقستان رەسپۋبليكاسىنىڭ حالىقتىڭ كوشى-قونى سالاسىنداعى زاڭناماسىن بۇزۋى» دەگەن 517-بابىنىڭ 2-بولىگى بويىنشا «شەتەلدiكتiڭ نەمەسە ازاماتتىعى جوق ادامنىڭ وسى باپتىڭ ءبىرىنشى بولىگىندە كوزدەلگەن مەرزىمدەردەن استام ۋاقىت ىشكى ىستەر ورگاندارىندا تىركەۋدەن وتپەي قازاقستان رەسپۋبليكاسىندا بولۋىنان نە تىركەۋ كەزىندە كورسەتىلگەن مەكەنجايدا تۇرماۋىنان، سول سياقتى قازاقستان رەسپۋبليكاسىنىڭ اۋماعى ارقىلى ترانزيتتىك جول ءجۇرۋ قاعيدالارىن ساقتاماۋدان كورىنگەن، قازاقستان رەسپۋبليكاسىنىڭ حالىقتىڭ كوشى-قونى سالاسىنداعى زاڭناماسىن بۇزۋى – ون بەس ايلىق ەسەپتىك كورسەتكىش مولشەرىندە ايىپپۇل سالۋعا نە قازاقستان رەسپۋبليكاسىنىڭ شەگىنەن اكiمشiلiك جولمەن شىعارىپ جiبەرۋگە اكەپ سوعادى.

«ارى قاراي نە بولادى؟» دەيسىز عوي؟!

ارى قاراي بۇل ماسەلە ەكى ءتۇرلى جولمەن شەشىلەدى.

ءبىرىنشى، اتالعان 517-باپتىڭ 2-بولىگىنە ساي، قانداستارىمىز جازاعا تارتىلىپ، ون بەس ايلىق ەسەپتىك كورسەتكىش مولشەرىندە ايىپپۇل تولەيدى نەمەسە قازاقستان رەسپۋبليكاسىنىڭ شەگىنەن اكiمشiلiك جولمەن شىعارىلىپ جىبەرىلەدى.

ايىپپۇل تولەگەن ازامات ءبىر جىلعا دەيىن ازاماتتىققا قۇجات تاپسىرا المايدى، قازاقستان رەسپۋبليكاسىنىڭ شەگىنەن اكiمشiلiك جولمەن شىعارىلىپ جىبەرىلگەن ازامات بەس جىلسىز قازاقستاعا ورالا المايدى!

وسى جانە باسقادا سەبەپتەرمەن 2015 جىلى 307, 2016 جىلى 199 ەتنيكالىق قازاق قازاقستان رەسپۋبليكاسىنىڭ شەگىنەن اكiمشiلiك جولمەن شىعارىلىپ جىبەرىلگەن.

ەكىنشى جولى، پوليتسيا قىزمەتكەرلەرىنە پارا بەرىپ قۇتىلادى.  

اتالعان ماسەلە سوڭعى جولمەن كوبىنەسە تەز ءارى وڭتايلى شەشىلەتىن كورىنەدى...

مىنە، ءسويتىپ، ۇزاق جىلداردان بەرى تۇراقتى تىركەۋگە تۇرۋ – قانداستارىمىزدى تۇرالاتىپ، قانىن سۇلىكتەي سورىپ كەلەدى.

سەنەسىز بە، دەپۋتات نۇرجان التاەۆ ەكەۋىمىز وسى ماسەلەگە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ جۇمىسپەن قامتىلۋى جانە كوش-قون ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى»  قازاقستان رەسپۋبليكاسى زاڭىنىڭ جوباسىن تالقىلاۋ ءۇشىن قۇرىلعان جۇمىس توبىنىڭ مۇشەلەرىنىڭ كوزىن كەشە – جۇمىس توبىنىڭ 18-وتىرىسىندا ارەڭ جەتكىزگەندەي بولدىق.

جۇمىس توبىنىڭ وتىرىسىندا قۋانىش سۇلتانوۆ، نۇرلان دۋلاتبەكوۆ، مايرا ايسينا، باقىتگۇل حامەنوۆا باستاعان دەپۋتاتتاردىڭ بىرىنەن سوڭ ءبىرىنىڭ ءسوز الىپ، كوسىلە سويلەيتىن سەبەبى – سول!

وتىرىس سوڭىندا جۇمىس توبىنىڭ جەتەكشىسى، دەپۋتات كارىباي مۇسىرمان بۇل ماسەلەنى قايتكەن كۇندە دە شەشەتىن ەتىپ، «حالىقتىڭ كوشى-قونى تۋرالى» زاڭىنا تولىقتىرۋ ەنگىزۋ ءۇشىن دەپۋتات نۇرجان باۋىرجانۇلىنا جاڭا ۇسىنىس ەنگىزۋ تۋرالى تاپسىرما بەردى.

ناتيجەسىن الداعى ۋاقىتتا كورەسىزدەر، قۇرمەتتى قانداستار!

اۋىت مۇقيبەك

Abai.kz