ىرعىز اۋدانىنىڭ پروكۋرورى ايدوس ساعىندىقوۆقا بايلانىستى دا ءدال وسىعان ۇقساس قىزمەتتىك تەكسەرۋ باستالعان.
وبلىس پروكۋرورىنىڭ كومەكشىسى وركەن ەشانوۆتىڭ سوزىنشە، "اۋدان پروكۋرورى قورىق تەرريتورياسىنان بالىق اۋلاماعان. ءىستىڭ ءمان-جايى قىزمەتتىك تەكسەرۋ اياقتالعاننان كەيىن بەلگىلى بولادى".
اقتوبە وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى باسشىسىنىڭ ورىنباسارى انۋاربەك بەرماعامبەتوۆتىڭ سوزىنشە، 3 قاڭتاردا ساعات 11:00 شاماسىندا ىرعىز-تورعاي مەملەكەتتىك تابيعي رەزەرۆاتى اۋماعىنان التى ادام ۇستالعان. ولاردىڭ ۇستىنەن "ەرەكشە قورعالعان تابيعي اۋماققا كىرگەنى ءۇشىن" اكىمشىلىك ءىس قوزعالعان. قورىققا كىرگەن التى ادامنىڭ ءبىرى "زاڭسىز بالىق اۋلادى" دەپ ايىپتالىپ وتىر.
وسىعان دەيىن جەرگىلىكتى باق "ەرەكشە قورعالاتىن اۋماققا لاۋازىمدى مەملەكەتتىك قىزمەتكەرلەردىڭ زاڭسىز كىرگەنى" تۋرالى حابار تاراتقان بولاتىن. ازاتتىقتىڭ "ۇستالعانداردىڭ اراسىندا لاۋازىمدى تۇلعالار بار ما؟" دەگەن سۇراعىنا 8 قاڭتاردا انۋاربەك بەرماعامبەتوۆ "ازاماتتاردىڭ اتى-ءجونى انىقتالىپ جاتىر" دەپ قىسقا قايىردى. ول لاۋازىمدى تۇلعالاردىڭ قورىققا كىرگەنى جايلى اقپاراتتى جوققا شىعارمادى.
اقتوبە وبلىسى اكىمدىگى ۇستالعان التى ادامنىڭ اراسىندا ايتەكە بي، ىرعىز اۋداندارىنىڭ اكىمدەرى جوق، بىراق سوت پەن پروكۋراتۋرا قىزمەتكەرلەرى بولۋى مۇمكىن دەپ ايتتى.
Abai.kz
