قاسىم-جومارت توقاەۆقا دۋبايداعى «EXPO-2020» حالىقارالىق كورمەسىندە سالىناتىن قازاقستان پاۆيلونى تانىستىرىلدى.

جاھاندىق ءىس-شارا 2020 جىلدىڭ 20 قازانى مەن 2021 جىلدىڭ 10 ءساۋىرى ارالىعىندا «اقىل-ويدى ۇشتاستىرۋ – بولاشاقتى قالىپتاستىرۋ» دەگەن تاقىرىپپەن وتەدى.

«EXPO-2020» كورمەسىن دامىتۋ جونىندەگى باسقارۋشى ديرەكتور احمەد ءال-ءحاتيبتىڭ ايتۋىنشا، كورمەگە 20 ميلليوننان استام ادام كەلەدى دەپ جوسپارلانۋدا.

قازاقستان پاۆيلونى بىرىككەن اراب امىرلىكتەرىنىڭ نەگىزگى پاۆيلونىنا جاقىن جەردەگى «مۇمكىندىكتەر» دەپ اتالاتىن كلاستەردە ورنالاسادى. ۇلتتىق ەكسپوزيتسيا بىرنەشە بولىكتەرگە بولىنگەن. وندا ءوڭىرىمىزدىڭ الەمدە الاتىن ورنى، ەلىمىزدىڭ تۋريستىك الەۋەتى، تاريحى، مادەنيەتى جانە استاناسى تۋرالى اقپارات بەرىلەدى. سونىمەن قاتار كورمەگە كەلۋشىلەر قازاقستاننىڭ ەكونوميكالىق جانە ينۆەستيتسيالىق مۇمكىندىكتەرى جونىندە مالىمەت الا الادى. ينتەراكتيۆتى شوۋدىڭ سوڭىندا پاۆيلون قوناقتارىنا جاساندى ينتەللەكتىنىڭ ادامزات بولاشاعىنا اسەرى تۋرالى ايتىلادى.

Abai.kz