بۇگىن رەسمي تۇردە ءال-ءفارابيدىڭ 1150 جىلدىق مەرەيتويى باستالدى. وسىعان وراي، الماتىداعى قازاق ۇلتتىق ۋنيۆەرسيتەتىندە «ءابۋ ناسىر ءال-فارابي اتىنداعى ورتالىق» سالتاناتتى تۇردە اشىلدى.

جيىنعا قر مەملەكەتتىك حاتشىسى قىرىمبەك كوشەرباەۆ، قر مادەنيەت جانە سپورت ءمينيسترى اقتوتى رايىمقۇلوۆا، قر ءبىلىم ءمينيسترى اسحات ايماعامبەتوۆ، بۇۇ جانە يۋنەسكو، يىۇ، قازاقستانداعى ديپلوماتيالىق ميسسيالاردىڭ وكىلدەرى، مەملەكەت جانە قوعام قايراتكەرلەرى، وتاندىق جانە شەتەلدىك باق وكىلدەرى، وقىتۋشىلار مەن ستۋدەنتتەر قاتىستى. قوناقتار ۇلى ويشىلعا ارنالعان مۇراجاي ەكسپوزيتسيالارىمەن تانىستى.

كەلەسى اپتادا «ءابۋ ناسىر ءال-فارابي ىزىمەن» حالىقارالىق ەكسپەديتسيا باستالادى. وعان قازاقستان، وزبەكستان، تۇركىمەنستان، يران، يراك، ليۆان، سيريا عالىمدارى قاتىسادى.

سونىمەن قاتار، قر مەملەكەتتىك حاتشىسى ق.ە. كوشەرباەۆ مەملەكەت باسشىسىنىڭ تاپسىرماسى بويىنشا بەلگىلى مادەنيەت جانە ونەر قايراتكەرلەرىنە قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ 2019 جىلعى مادەنيەت سالاسىنداعى مەملەكەتتىك ستيپەندياسىن تابىس ەتتى. مەملەكەتتىك ستيپەنديا قازاقستاننىڭ 75 ادەبيەت پەن ونەر قايراتكەرلەرىنە بەرىلدى.

جىل سايىن تاعايىندالاتىن مەملەكەتتىك ستيپەنديا – مەملەكەتتىڭ مادەنيەت پەن ونەر قايراتكەرلەرىنە، شىعارماشىلىق قىزمەتكەرلەرىنە جانە جاس دارىندارعا جاساعان قولداۋى مەن قامقورلىعىنىڭ ايعاعى، سونداي-اق، ولاردىڭ قازاقستاننىڭ مادەنيەتىن وركەندەتىپ، الەمگە تانىتۋعا قوسقان ۇلەستەرىنە كورسەتىلگەن قۇرمەت.

قر تۇڭعىش پرەزيدەنتى - ەلباسى ستيپەندياسى ءاسانالى ءاشىموۆ، مىرزاتاي جولداسبەكوۆ، ءسابيت دوسانوۆ، بيبىگۇل تولەگەنوۆا، ەسكەندىر حاسانعاليەۆ جانە باسقا دا قازاق ادەبيەتى مەن ونەرىنىڭ مايتالماندارىنا تابىستالدى.
سونىمەن بىرگە، كانن حالىقارالىق فەستيۆالىنىڭ لاۋرەاتى سامال ەسلاموۆاعا، اكتريسا اينۇر راحيپوۆاعا، بالەت ءارتىسى باقتيار ادامجانعا، اقىن قانات وماروۆقا، ءداستۇرلى مۋزىكا ونەرىنىڭ ورىنداۋشىسى مەدىعات ماناپوۆقا، كينو رەجيسسەرى فارحات شارىپوۆكە جانە وزگە دە جاس دارىندارعا مەملەكەتتىك قولداۋ كورسەتىلدى.

Abai.kz