جۋىردا سولتۇستىك قازاقستان وبلىسى جامبىل اۋداندىق ءماسليحاتىنىڭ دەپۋتاتتارىمەن كەزدەسكەنىمدە ماعان مايبالىق اۋىلدىق وكرۋگىنە قاراستى جاڭاجول اۋىلىن تىرەك ەلدى مەكەندەر تىزىمىنە ەنگىزۋ ماسەلەسىن شەشۋگە جاردەمدەسۋ تۋرالى ءوتىنىش ايتىلدى.

راسىندا دا، مايبالىق اۋىلدىق وكرۋگىنە قارايتىن 4 اۋىلدىڭ ەشقايسىسى تىرەك نەمەسە سەرىكتەس ەلدى مەكەندەر قاتارىنا جاتقىزىلماعان بولىپ شىقتى. بۇل ولاردىڭ بولاشاعى بۇلىڭعىر دەگەندى بىلدىرەدى. شىنىندا دا سولاي ما؟
جامبىل اۋدانىنىڭ اكىمى مۇراتبەك ابىشەۆتىڭ ايتۋىنشا، جاڭاجول اۋىلىنىڭ الەۋمەتتىك-ەكونوميكالىق الەۋەتى ونى تىرەك ەلدى مەكەن رەتىندە بەلگىلەۋگە مۇمكىندىك بەرەدى. سەبەبى وندا 22 مىڭ گەكتار ەگىستىك جەرگە يە بازالىق شارۋاشىلىق – «اگروفيرما جامبىلسكايا» جاۋاپكەرشىلىگى شەكتەۋلى سەرىكتەستىگى جۇمىس ىستەيدى. 61 وقۋشى ءبىلىم الىپ جۇرگەن ورتا مەكتەپ پەن ينتەرنات، شاعىن ورتالىق، مەديتسينالىق پۋنكت، كلۋب، كىتاپحانا جانە عابيت مۇسىرەپوۆتىڭ مۋزەيى بار. اۋىل تازا اۋىزسۋمەن قامتاماسىز ەتىلگەن.

بۇعان قوسا، جاڭاجول اۋىلى – اسا كورنەكتى جازۋشى عابيت مۇسىرەپوۆتىڭ تۋىپ-وسكەن جەرى، مادەني-تاريحي ماڭىزى بار ەلدى مەكەن ەكەندىگىن دە ەسكەرۋ قاجەت.

بۇل رەتتە جامبىل اۋدانىنىڭ اكىمى وسى اۋدانداعى تىرەك ەلدى مەكەندەر تىزىمىنە ەنگىزىلگەن اۋىلداردىڭ بىرەۋىن اتالعان تىزىمنەن الىپ تاستاپ، ونىڭ ورنىنا جاڭاجول اۋىلىن ەنگىزۋگە قارسى ەمەستىگىن دە ءبىلدىردى.

بۇگىن وسى ماسەلەنى وڭ شەشۋ جونىندە ۇلتتىق ەكونوميكا ءمينيسترى رۋسلان دالەنوۆتىڭ اتىنا حات جولدادىم.

ەلىمىزدەگى تىرەك جانە سەرىكتەس ەلدى مەكەندەر ءتىزىمىن جاساۋ كەزىندە اۋداندىق اكىمدىكتەردىڭ پوزيتسياسى ەسكەرىلمەگەندىگى انىق. بۇل – قىنجىلارلىق جايت.

كارىباي مۇسىرمان،

ءماجىلىس دەپۋتاتى.

Abai.kz