قازاقستاننىڭ حالىق ءارتىسى التىنبەك قورازباەۆ قوردايداعى جانجالعا بايلانىستى پىكىرىن ءبىلدىرىپ، كوپتى اۋىزبىرشىلىككە شاقىردى.

«قادىرلى حالقىم! جامبىل وڭىرىندەگى جەرلەستەرىم! كەشەلى بەرى ايقاي-شۋ كوبەيىپ، ەستۋىمشە ۇلتارالىق كەلىسپەۋشىلىك بولىپ جاتقان كورىنەدى. اينالايىندار، ءبىز قازاق دەگەن كەڭ حالىقپىز. قۇشاعىمىز دا كەڭ. ءبىز وتە سانالى دا اقىلدى، بارلىق جاعىنان – ساۋدا بولسىن، ونەر بولسىن بەيىم حالىقپىز. كىشكەنە سابىر ساقتاڭىزدار. ەل ىشىندە ءبىر-ەكى بۇزىق بولۋى مۇمكىن. ول بىزدە دە، باسقادا دا بار. باياعى سوعىس كەزىندە نەمىستەردى، شەشەندەردى، قاراشايلار مەن ۋكراينداردى قۇشاعىمىزعا العان ەلمىز. اكەم تىپتەن ەكى بولمەلى كىشكەنتاي قورجىن تامىنا التى بالاسىمەن بىردەي مۇحامەت دەگەن قاراشاي ازاماتىن پانالاتقان. ال ولار قازىر قازاق دەسە جانىن بەرەدى. وتكەنىمىزگە قاراپ، اقىلعا توقتايىق»، - دەيدى التىنبەك قورازباەۆ.

قازاقستاننىڭ حالىق ءارتىسى زايىرلى ءارى قۇقىقتىق مەملەكەتتە ءىستىڭ اق-قاراسى انىقتالاتىنىنا سەنىم ءبىلدىردى.

«جۇدىرىق بىزدىكى ەكەن دەپ، وكتەمدىك جاساماي-اق قويايىق، اعايىن. اقىلعا توقتاڭدار. دۇنگەندەر - ەڭبەكقور. باياعىدا ەسىمدە جامبىل وبلىسىنداعى ۋلانوۆكا دەگەن اۋىلدا دۇنگەننەن كەڭەس وداعىنىڭ ەڭبەك ەرى بولدى. جۇمىس دەسە بۇلار قۇلشىنا كىرىسەتىن. جەر تىرمالاپ جىلىنا ءۇش-ءتورت رەت ءونىم الىپ جاتاتىن. كەشەگى لوندوندا وتكەن وليمپيادا ويىندارىندا وسى دۇنگەننەن سپورتشىلار قازاقتىڭ كوك تۋىن جەلبىرەتىپ، الەمگە قازاقتى پاش ەتتى. الماتىدا دۇنگەننەن كومپوزيتور دوسىم بار. ول كىسى قازاق دەسە ىشكەن اسىن جەرگە قويادى. تاتۋ-ءتاتتى ومىرىمىزبەن باسقا ەلگە ۇلگىمىز. كۇندە شۋ مەن ايقاي بولىپ جاتسا، مۇنىڭ ارتى جاقسىلىققا اپارمايدى. اقىلعا كەلىڭدەر، اينالايىندار»، - دەپ ءسوزىن اياقتادى التىنبەك قورازباەۆ.

بۇعان دەيىن جامبىل وبلىسىنىڭ قورداي اۋدانىنداعى ماسانچي اۋىلىنىڭ تۇرعىندارى اراسىندا جاپپاي توبەلەس بولعانىن حابارلاعان بولاتىنبىز. كوپ وتپەي پرەزيدەنت قاسىم-جومارت توقاەۆ جامبىل وبلىسى قورداي اۋدانىندا بولعان جاپپاي توبەلەسكە قاتىستى پىكىر ءبىلدىردى.

«جامبىل وبلىسى قورداي اۋدانىندا بۇزاقىلىق سيپاتتاعى جاپپاي توبەلەس بولدى. ونى ارانداتۋشىلار ءوز پايداسىنا قولدانباق بولعان. پوليتسيا جاعدايدى رەتتەپ، ءوز باقىلاۋىنا الدى. قوعامدىق ءتارتىپتى بۇزعاندار جاۋاپكەرشىلىككە تارتىلادى» دەپ جازدى قاسىم-جومارت توقاەۆ Twitter-دەگى پاراقشاسىندا.

ال بۇگىن مەملەكەت باسشىسى جامبىل وبلىسىنداعى وقيعاعا بايلانىستى مالىمدەمە جاسادى.

Abai.kz