"الماتى قالاسىندا 1990 جانە 1987 جىلعى ەكى ازامات Facebook جەلىسىندە ۇلتارالىق ارازدىق قوزدىرىپ، كۇش قولدانۋعا شاقىردى. 9 اقپاندا 1983 جىلعى تاراز تۇرعىنى WhatsApp جەلىسى ارقىلى وسىعان ۇقساس اقپارات تاراتقان" دەلىنگەن مالىمدەمەدە.

ولاردىڭ ۇستىنەن قىلمىستىق كودەكستىڭ 272-باپ 3-ءبولىمى ("جاپپاي تارتىپسىزدىك") بويىنشا سوتقا دەيىنگى تەرگەۋ امالدارى باستالعان.

باس پروكۋروردىڭ ورىنباسارىنىڭ ايتۋىنشا، قازىر دە الەۋمەتتىك جەلىدە "ۇلتارالىق تۇراقتىلىققا قاۋىپ توندىرەتىن" ۆيدەولار تاراپ جاتىر جانە ولاردىڭ اراسىندا قوردايداعى وقيعالارعا قاتىسى جوق ۆيدەولار دا بار.

7 اقپان كەشكە جامبىل وبلىسى قورداي اۋدانىندا قازاقتار مەن دۇنگەندەر جانجالداسىپ، رەسمي دەرەك بويىنشا، 10 ادام قازا تاپتى. 40-تان استام ادام جارالانعان. قوردايداعى جانجال كەزىندە قىرعىزستانمەن شەكاراعا جاقىن ورنالاسقان، نەگىزىنەن ەتنيكالىق دۇنگەندەر تۇراتىن ماسانچي، سورتوبە، اۋقاتتى اۋىلدارىندا، رەسمي مالىمەت بويىنشا، 15 عيمارات پەن 30-دان استام ءۇي ءبۇلىنىپ، 23 كولىك ورتەندى. جانجالدان سوڭ مىڭداعان ادام قىرعىزستانعا قاشقان. كەيىن ۇكىمەت قىرعىزستانعا كەتكەندەر ۇيىنە ورالعانىن حابارلادى.

كەيبىر ساراپشىلار قوردايداعى جانجال ەلدەگى الەۋمەتتىك جاعدايدىڭ، اۋىل حالقىنىڭ تۇرمىسىنىڭ تومەندىگىن، قازاقستان بيلىگىندە مۇنداي قيىن جاعدايلاردى تەز شەشەتىن مەحانيزم قالىپتاسپاعانىن كورسەتتى دەپ سانايدى.

قازاقستان ۇكىمەتى جانجالعا بايلانىستى 25 قىلمىستىق ءىس قوزعالعانىن مالىمدەدى. بىراق قانشا ادام ۇستالعانىن اشىپ ايتپاي وتىر. تەك جانجال كەزىندە 19 پوليتسەيدىڭ زارداپ شەككەنىن حابارلادى.

قازاقستان پرەزيدەنتى قاسىم-جومارت توقاەۆتىڭ ءوزى العاشىندا بۇل داۋدى "بۇزاقىلىق سيپاتتاعى جاپپاي توبەلەس" دەپ سيپاتتاپ، كەيىن "ۇلتارالىق جانجال تۋدىرعاندار" دەپ "ارانداتۋشىلاردى" ايىپتادى.

Abai.kz