دجوردانو برۋنونى ورتەگەن جەرگە ءوزىنىڭ ەسكەرتكىشى ورناتىلدى
و، دجوردانو! وتقا ورانعان باتىرىم. تۋرا 4 عاسىر، 20 جىل بۇرىن عىلىمعا دەگەن سەنىمىڭ ءۇشىن قىزىل جالىن الىپ ەدى جانىڭدى. سودان بەرى تالاي زامان زۋلاپ ءوتتى. ورتاعاسىر تۇنەگىنەن ءوزىڭ جاققان عىلىم شوعى ەۋروپانى الەمگە كوشباسشى ەتتى. كوزسىز قاراڭعىلىق، سوقىر سەنىممەن كۇرەستىڭ قولباسشىسى ءوزىڭ ەدىڭ. قىل ارقانمەن بايلاپ، قىزىل شوققا تاستاسا دا، سوڭعى دەمىڭ شىققانشا ەۋروپانىڭ ەسسىز حالقى عىلىم كۇشىن تۇسىنەر دەپ و دۇنيەگە اتتانعان بولارسىڭ؟! ءتۇسىندى. عىلىمدى دا، سەنىڭ يدەياڭدى دا ءتۇسىندى.
دجوردانو! بىراق...بىراق سول ءبىر تۇنەك، ءتورت عاسىر وتكەن سوڭ سول ءبىر قاراڭعىلىق مەنىڭ ەلىمدە پايدا بولعانداي. اينالامدا تەرىس دىننەن باسقانى كورمەيتىن، وقۋدى قۇپ سانامايتىن، عىلىمدى قاجەتسىز دەيتىن اسىرەلەر كوبەيدى. رۇقسات ەتسە ءوزىڭ سىندى ەرەكشە وي يەلەرىن وتقا تاستاۋعا دا دايىن. سەن ادامزاتتى عىلىمدى تۇسىنەتىن جانە تۇسىنبەيتىن دەپ ەكىگە ءبولدىڭ، ولار ادامزاتتى ءبىزدىڭ دىننەن جانە بىزگە قارسىلار دەپ بولەدى. كوزدەرىندە مەيىرىم جوق، جۇرەكتەرى تاس ىسپەتتەس. سەنى ولتىرگەن ءدىن فاناتيكتەرى، باسقا كەيىپپەن كەلىپ قازاقستاندىق دجوردانولاردى مايىپ ەتپەۋ ءۇشىن نە ىستەۋ كەرەك، برۋنو! تاريحتىڭ كەرى اينالعان دوڭگەلەگىن، قالاي ءتۇزۋ جولعا سالساق بولادى؟
پىسى: 1600 جىل، 17 اقپان. دجوردانو برۋنونى ينكۆيزيتسيا عىلىمي كوزقاراسى ءۇشىن وتقا جاقتى. ول "كۇن جەردى ەمەس، جەر كۇندى اينالادى" دەگەن سەنىمىنەن باس تارتپادى. قازىر بۇل تەوريا تولىق دالەلدەنگەن. عاسىرلار وتكەن سوڭ دجوردانو برۋنونى ورتەگەن جەرگە ەسكەرتكىش ورناتىلدى.
اسحات قاسەنعاليدىڭ الەۋمەتتىك جەلىدەگى جازباسىنان
Abai.kz
