21 اقپاندا «اشىق الاڭ» باعدارلاماسىندا قازاق كۇرەسىن وليمپيادا ويىنىنىڭ قاتارىنا جانە ورتا مەكتەپتىڭ وقۋ باعدارلاماسىنا كىرگىزۋ  ماسەلەلەرى تالقىلاندى. وعان بەس سپورت مامانى مەن ساياساتكەر قۋاندىق شاماحايۇلى قاتىستى.

رەسپۋبليكالىق قازاق كۇرەسى فەدەراتسياسىنىڭ توراعاسى جاندوس قونىسباەۆ  سپورتتىڭ ۇلتتىق ءتۇرىن وليمپيادا ويىندارىنا ەنگىزۋ جايلى قىسقاشا اقپارات بەرىپ، ماسەلەنىڭ كوتەرىلگەنىنە التى جىل بولعانىنا، الدە دە ءبىراز تۇيىندەر شەشۋىن تابا الماي كەلە جاتقانىنا توقتالدى. سپيكەردىڭ ويلارىن  مەكەمەنىڭ حاتشىسى باقداۋلەت ءسابيتوۆ، دۇنيەجۇزىلىك قازاق كۇرەسى فەدەراتسياسىنىڭ توراعاسى تالعات مازباەۆ تولىقتىردى.

«قازاق كۇرەسى» كۇردەلى ءسوز، ونى «سامبو»، نەمەسە «دزيۋدو» سياقتى قىسقا تەرمينمەن الماستىرۋ قاجەت، «بەلدەسۋ»، «بەلدەسپە»، «بالۋان كۇرەس» دەپ اتاۋ جونىندە ونعا جۋىق ۇسىنىستار تۇسكەنى، تاتارلار ءوز كۇرەسىن «بەلدەسۋ»  دەيتىنى ايتىلدى.

سپورت كومەنتاتورى قايىرجان ماۋلەن قولدانىلالاتىن ايلا تاسىلدەر دە حالىقارالىق ستاندارتقا ساي بولۋى قاجەت، بۇگىنگى تاڭدا ورىس تىلىنەن «كالكا» جاساپ ءجۇرمىز، دەپ مەنى تاڭقالدىردى. سوندا قالايشا ۇلتتىق ويىن تۇرىنەن جاسالاتىن ءىس قيمىلداردىڭ اتاۋى وسى كۇنگە دەيىن قالىپتاسپاعان؟

اقپارات جانە قوعامدىق دامۋ ءمينيسترى داۋرەن اباەۆ ورتا مەكتەپتىڭ وقۋ باعدارلاماسىنا قازاق كۇرەسى كىرەتىنى جايلى مالىمدەگەنى ايتىلدى. نەگىزگى پىكىرتالاس وسى ماسەلەنىڭ اينالاسىندا ءوربىدى.

سپيكەر بۇل جوبا الداعى وقۋ جىلىنان باستاپ «نۇر–سۇلتان» قالاسىنداعى  بەس مەكتەپتە سىناقتان وتەتىنىن، ءپان بەسىنشى سىنىپتان باستاپ ءونبىرىنشى سىنىپقا دەيتىن جالعاساتىنىن، 102 ساعات ساباق وتكىزىلەتىنىن ايتتى. نەگىزگى ماقسات - ۇلتتىق سپورتتىڭ بۇل ءتۇرىنىڭ عىلىمي نەگىزدەرىن جاستارعا وقىتىپ، تەوريالىق بىلىممەن قاتار، پاتريوتتىق تاربيە  بەرىپ، قازاق كۇرەسىن «دزيۋدو» دارەجەسىنە دەيىن كوتەرۋ ەكەن.

قۋاندىق شاماحايۇلى جالعىز ءوزى قازاق كۇرەسى ماماندارىنا پىكىرتالاستا قارسى تۇرۋىنا تۋرا كەلدى. ول  بۇل ۇسىنىسقا تۇبەگەيلى قارسى ەكەنىن ءبىلدىرىپ،  سپورت ماماندارى جالپى جانە ارنايى ءبىلىم بەرۋ تالاپتارىن شاتىستىرىپ وتىرعانىنا نازار اۋداردى. سپيكەر ورتا مەكتەپ وقۋشىلارىنا حيميا، فيزيكا، ماتەماتيكا، بيولوگيا جانە  تاعى باسقا پاندەردەن بازالىق تەرەڭ ءبىلىم بەرۋدىڭ ورنىنا، اركىم ويىنا كەلگەنىن تىققىشتاپ جاتقانىن ايتىپ، ەرتەڭ مۇمكىن بىرەۋ كوكپاردى وقۋ باعدارلاماسىنا كىرگىزۋ كەرەك دەر، سوندا نە بولماق؟ مەن دەنە تاربيەسىنە، دەنە شىنىقتىرۋعا قارسى ەمەسپىن، ول ءپان رەتىندە بۇرىنعىشا وقىتىلۋى كەرەك، قازاق كۇرەسىنە كەلسەك، ونىمەن ارنايى مەكتەپ نەمەسە كوللەجد وقۋشىلارى اينالىسۋى قاجەت، دەدى.

دۇنيەجۇزىلىك قازاق كۇرەسى فەدەراتسياسىنىڭ وكىلى تالعات مازباەۆ  ارىپتەستەرىنىڭ ۇسىنىسىمەن تانىس ەمەس ەكەنىن، بۇگىن عانا ەستىپ وتىرعانىن مالىمدەدى. وسى ماسەلە بويىنشا حالىقتىڭ پىكىرىن بىلەيىك، دەپ باعدارلاما جۇرگىزۋشىسى، جاس مولشەرى وتىز-وتىزبەستەن اسپاعان، تۇرلەرىنە قاراعاندا سپورتپەن شۇعىلداناتىن بەس-التى ەر ادامنىڭ پىكىرىن كورسەتتى. ءبارى قىزۋ قولداۋ ءبىلدىردى. بىراق تا ولاردىڭ پىكىرى بۇكىل حالىقتىڭ پىكىرىن بىلدىرمەيتىنى انىق...

سوندا الدىمىزداعى كۇزدەن باستاپ نۇر سۇلتان قالاسىنىڭ بەس مەكتەبىندە سىناقتان وتەتىن قازاق كۇرەسى جوباسى جىنىسى مەن ماشىقتانۋىنا   قاراماستان وقۋشىلار سپورتتىڭ وسى تۇرىمەن اينالىسۋ مىندەتتى بولماق پا؟  مۇمكىن بىرەۋلەر شاحماتپەن، ەكىنشىلەرى كونكي نەمەسە شاڭعى، ءۇشىنشىسى ۆەلوسپورت نەمەسە گيمناستيكامەن اينالىسقىسى كەلەتىن شىعار؟ نە سەبەپتى  دەنەشىنىقتىرۋ ساباعى بۇرىنعىشا ءپان رەتىندە جۇرگىزىپ، وقۋشىلار قالاعان سپورت تۇرىمەن اينالىسپايدى؟ قازاق كۇرەسىن ورتا مەكتەپتىڭ وقۋ باعدارلاماسىنا ەندىرۋ جايلى ۇسىنىس ءبىلىم جانە عىلىم مينيسترلىگىمەن كەلىسىلدى مە؟ نەگە اتالعان مەكەمەنىڭ وكىلى شاقىرىلماعان؟ تابىستى سپورت تۇرلەرى تولىپ جاتىر. ماسەلەن فۋتبول، شاڭعى، مانەرلەپ سىرعاناۋ،  گيمناستيكا جانە ت.ب. نە سەبەپتى سولارعا كوبىرەك كوڭىل بولىنبەيدى؟

جاقىندا ۇلتتىق كەڭەستىڭ ءبىر مۇشەسى ءبىرىنشى سىنىپتان باستاپ مەكتەپ وقۋشىلارىنا زاڭ ۇيرەتۋ كەرەك، كەلەسى وتىرىستا وسى ماسەلەنى تالقىلاۋدى ۇسىناتىنىن جازىپتى. ەگەمەندىك العان وتىز جىلعا جۋىق ۋاقىتتا وقۋ باعدارلاماسىنا قانشاما وزگەرىستەر ەنگىزدىك. سونىڭ كوپشىلىگى وڭ ناتيجە بەردى مە؟ وسىدان ەكى-ءۇش جىلداي بۇرىن ءۇش ءتىلدى بىردەن ءبىلۋ كەرەك، جوعارعى سىنىپتاردا ينفورماتيكا مەن تابيعاتتانۋ پاندەرىن اعىلشىن تىلىندە جۇرگىزۋ كەرەك، دەپ ۇستازداردى وقىتۋ ءۇشىن ميللياردتاعان قاراجاتتى جەلگە ۇشىردىق. قاشانعى ادىستەمەلىك تۇرعىدان نەگىزدەلمەگەن، جەكە ادامداردىڭ جوسپارىن ىسكە اسىرامىز، دەپ وقۋ باعدارلاماسىنا رەفورما جاساي بەرمەكپىز؟

مۇرات قويشىباەۆ

Abai.kz