بەيبىت ميتينگسىز ازاماتتىق قوعام جوق. اسكەري-پوليتسيالىق كازارمالىق ساياسي جۇيە قالىپتاستىرعان ەشبىر ەل دامىمايدى، قۇردىمعا كەتەدى، ونىڭ سوڭى قارۋلى قاقتىعىسقا، ازاماتتىق سوعىسقا يتەرمەلەۋى ىقتيمال.

ەلىمىزدىڭ بەيبىت تە مامىراجاي ءومىر سۇرۋىنە ءبارىمىز دە اسا مۇددەلىمىز. ولاي بولسا، حالىقتىڭ ءسوزى مەن تالاپتارىنا قۇلاق اسقان، ءوز ازاماتتارىمەن ءتىل تابىسا العان، ولارمەن سالماقتى ديالوگ قۇرىپ، مامىلەگە كەلگەن، قوعامداعى ەركىن وي-پىكىرمەن ءاردايىم ساناسقان اشىق، جاريالى ساياسي بيلىك قانا ءوز عۇمىرىن ۇزارتا الادى. حالىقتىڭ بيلىكتەن تالاپ ەتەتىن دۇنيەسىنىڭ ءوزى سونشالىقتى كۇردەلى ورىندالۋى قيىن نارسە ەمەس. باستىسى، الەۋمەتتىك ادىلەتتىلىك، زاڭ الدىندا ەل ازاماتتارىنىڭ تەڭ بولۋى، ول ءۇشىن شىن قىلمىسكەردىڭ جازادان قۇتىلماۋى، سول سەكىلدى اق ادال جانداردىڭ جازىقسىز جاپا شەگىپ، كۇشتىك قۇرىلىمداردىڭ قۇربانىنا اينالماۋى عانا كەرەك.

سونداي-اق ەل قازىناسىنان الدە ءبىر پارازيتتەردىڭ ورتاق بايلىقتى تالان-تاراجعا سالىپ، تويىمسىز مەشكەي، اشكوز ماسىلعا اينالماۋى. ادال ەڭبەكتىڭ اقى-قاقىسى قوعام دامۋىنا قوسقان ۇلەسىنە ساي ءادىل وتەلۋى ماڭىزدى.

كونستيتۋتسيا ارقىلى كەپىلدەندىرىلگەن نەگىزگى قۇقىقتارىنىڭ لايىقتى جۇزەگە اسىرىلۋىن تالاپ ەتۋگە اركىمنىڭ تولىقتاي قاقىسى بار. بيلىكتىڭ ءوزى دە ءجيى اۋىزعا الاتىن ءادىل سايلاۋ وتكىزۋ، ادام قۇقىعىن ساقتاۋ، ءسوز بوستاندىعىن قورعاۋ، سوت تاۋەلسىزدىگى مەن دەربەستىگىن قامتاماسىز ەتۋ، سىبايلاس جەمقورلىقپەن ىمىراسىز كۇرەسۋ سەكىلدى قوعامداعى قوردالانعان پروبلەمالاردى حالىق بەيبىت ميتينگتەر ارقىلى كوتەرۋگە تىرىسادى. ال، سول بەيبىت حالىقتىڭ ءۇنىن ءوشىرۋ ءۇشىن پوليتسيا مەن ارنايى جاساقتىڭ ەشبىر قىلمىسى جوق، ەشقانداي قارۋ-جاراقسىز ازاماتتارعا ورىنسىز سوقتىعىپ، قولدارىن قايىرىپ، 3-4-دەن جابىلىپ كوتەرە كەتىپ اۆتوزاكتارعا تيەيتىنى نەسى؟! مۇنداي زورلىق-زومبىلىق قۇل يەلەنۋ قوعامى نەمەسە فەوداليزمدە دە بولماعان شىعار.

پوليتسيانىڭ ميسسياسى - بەيبىت ميتينگ پەن حالىق شەرۋلەرىن قورعاۋ، قاۋىپسىزدىگىن قامتاماسىز ەتۋ عانا. ال، ءبىزدىڭ ەلدە مۇلدە ولاي ەمەس. كەرىسىنشە، ءوز حالقىنا قىرعيداي ءتيىپ قورلاۋعا كوشەدى. ونىسى از بولعانداي ءتۇن ورتاسىندا ءوز ۇيىندە تىنىش ۇيىقتاپ جاتقان ادامدى زاڭسىز ۇستاپ اكەتىپ ولتىرە سالاتىن بولدى.

حالىقتى بۇلاي اشىندىرىپ، وزىنە دەگەن نارازىلىقتى ءورشىتۋدىڭ سوڭى بيلىكتىڭ وزىنە شىعارعان قاتال ۇكىمىنە اينالىپ كەتۋى بەك مۇمكىن. قاتىگەز بيلەۋشىلەردىڭ ۇشپاققا شىققانى تاريحتا جوق. ءوز كەزەگىندە ازاماتتىق قوعام دا ميتينگ مادەنيەتىن مەڭگەرۋگە ۇمتىلعانى ابزال. قازىرگىدەي ستيحيالى تۇردە ەمەس، وركەنيەتتى ەلدەردەگىدەي الدىن الا دايىندىقپەن، كۇنتارتىبىن بەلگىلەپ، بەكىتىپ، وي پىكىرلەرىن ەركىن بىلدىرۋمەن قاتار الىپ شىعاتىن لوزۋنگ ۇراندارىن دا كوتەرەتىن ماسەللەرىنىڭ مازمۇنىنا ساي ەتۋ ت.س.س

ارينە، بۇگىنگە دەيىن كوشەگە شىققان حالىق ادەپتەن وزعان جوق. ءتارتىپ بۇزىپ، ەشتەڭە بۇلدىرگەن جوق. كەرىسىنشە، ارنايى جاساق پەن پوليتسيا بەيبىت حالىقتىڭ بەرەكەسىن الىپ ورىنسىز مازالاپ، قۇقتارىن بۇزىپ جاتىر.

بيلىك ءوز حالقىن بۇلايشا باسىنۋىنا ەش بولمايدى، سىي-قۇرمەت كورسەتۋلەرى كەرەك، ساناسا بىلۋلەرى ءتيىس.

قۋاندىق شاماحايۇلىنىڭ الەۋمەتتىك جەلىدەگى جازباسىنان

Abai.kz