(قازاقستان پرەزيدەنتى مەن حالقىنا ۇندەۋ)

الەمدەگى قازاقتىڭ جالعىز وتانى – قازاقستان. 

قازىرگى تاڭدا قازاقتىڭ قازاقستاننان وزگە پاناسى دا، يەسى دە جوق.

وتكەن عاسىردا وتارشىلدىق پەن قولدان جاسالعان اشارشىلىقتىڭ  كەسىرىنەن ءبىزدىڭ حالقىمىز ءوراسان زور شىعىنعا ۇشىراپ كەلدى.

ەلىمىز تاۋەلسىزدىك الىپ،  الىستا جۇرگەن اعايىندى قاراشاڭىراققا جيىپ الۋدى ەرتە قولعا العانىمەن، وتىز جىلدا ارەڭ ءبىر ميليوننان استام قازاق زورعا ورالدى. شەتتە ءالى دە بەس-التى ميليون قازاق قالىپ بارادى. وكىنىشكە وراي، سوڭعى ءتورت-بەس جىلدىڭ كولەمىندە ولاردىڭ جاعدايى كۇن ساناپ قيىنداپ كەتتى. ءتىل مەن دىننەن، ۇلتتىق بولىمىسىنان ايىرىلىپ بارا جاتقانى ءوز الدىنا، قىتايداعى ءۇش ميلليونعا تاياۋ قازاق قىرىلىپ قالۋ قاۋپى الدىندا تۇر. 

قىتاي سوڭعى ۋاقىتتا «تەرروريزممەن جانە ەكسترەميزممەن كۇرەس» دەپ سيپاتتاپ، ناتيجەدە ەتنيكالىق ءمۇسىلمان ۇلتتارعا ساياسي قىسىم جاساپ كەلسە، ەندى «كوروناۆيرۋستان ساقتانۋ شاراسى» اياسىندا ولاردى «ءۇي تۇتقىنىنا» الدى. اۋىل مەن اۋىلدىڭ اراسىنداعى جولدار جابىلىپ، ەكى كورشىنىڭ ءبىرىنىڭ ۇيىنە ەكىنشىسىنىڭ كىرۋىنە شەكتەۋ قويىلدى. وسى جاعدايعا بايلانىستى، ءدارى-دارمەك، ازىق-تۇلىك تاپشىلىعى تۋرالى اقپاراتتار دۇركىن-دۇركىن تاراپ جاتقانى جاسىرىن ەمەس. 

اقش پەن قىتاي اراسىنداعى ساۋدا سوعىسى قىتاي ەكونوميكاسىن زور داعدارىسقا ۇشىراتتى. جۇمىسسىزدىق پەن جۇقپالى اپات قىتاي حالقىن سانسىراتىپ بارادى.

ەگەر، «كوروناۆيرۋسپەن كۇرەسۋ شاراسى» ارى قاراي جالعاسا بەرسە، ءبىز اي مەن كۇننىڭ امانىندا ءۇش ميلليون قازاقتان باسى ءبۇتىن ايىرىلىپ قالۋىمىز بەك مۇمكىن!

سول ءۇشىن مەن قازاقستان بيلىگى حالىقارالىق زاڭنامالار مەن شارتتارعا جانە كىسىلىك قۇقىققورعاۋ ۇيىمدارىنا سۇيەنە وتىرىپ، قىتايمەن كەلىسىپ، شىڭجاڭداعى قانداستارىمىزدى قازاقستانعا تۇگەل كوشىرىپ الۋدى تالاپ ەتەم! 

سونداي-اق، بۇكىل قازاق قوعامىنىڭ ىشكى نارازىلىق پەن رەنىشتى دوعارىپ، وسى ماسەلەگە ءۇن قوسۋىن سۇرايمىن!

قازاقستاندىق اۋقاتتى ازاماتتاردىڭ اتالعان شاراعا قارجىلاي كومەكتەسۋىن وتىنەم!

اۋىت مۇقيبەك،

قر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ مۇشەسى.

Abai.kz