تۋرسۋنبەك بەيشەنبەكوۆ – مەنىڭ قىرعىز باۋىرىم. ول بۇگىن وردا بۇزار وتىز جاسقا تولىپ وتىر.

مەنىڭ بۇل ازاماتپەن تانىسۋىما قىرعىز رەسپۋبليكاسىنداعى، ءتىپتى ورتا ازياداعى پارلامەنتتىك دەموكراتيانىڭ ءجۇزى جانە سيمولى بولعان قىرعىزدىڭ اسا كورنەكتى قوعام جانە مەملەكەت قايراتكەرى ومۇربەك تەكەباەۆ تۋرالى جازعان «مانداتسىز پرەزيدەنت» اتتى شاعىن پوەمام سەبەپ بولدى.
قىرعىز رەسپۋبليكاسىنىڭ بۇرىنعى پرەزيدەنتى المازبەك اتامباەۆتىڭ «ءوزىم بىلەم، ەتىگىمدى تورگە ىلەم» ساياساتىنا قارسى شىققان ومۇربەك چەركەشەۆيچتىڭ ەرلىگى مەن بەت قاراتپاس كۇرەسكەرلىگى مەنىڭ وسىنداي تاقىرىپپەن ولەڭ جولدارىن جازۋىما تۇرتكى بولعانىن قازاق پەن قىرعىز وقىرماندارى جاقسى بىلەدى دەپ ويلايمىن.

اتالعان پوەمانى جازىپ، 2016 جىلدىڭ 21 جەلتوقسانىندا ءوزىمىزدىڭ «Abai.kz» اقپاراتتىق پورتالىنا شىعاردىم. ەندى، ونىڭ قىرعىز جۇرتىنا، ناقتىلاپ ايتسام، پوەماما ارقاۋ بولعان تۇلعاعا قالاي جەتكىزسەم ەكەن دەپ وتىرعام. تۋىسقان وزبەك، ازەربايجان، تاتار جانە قىرعىز جاڭالىقتارىن شولىپ شىعاتىن كۇندەلىكتى ادەتىممەن ينتەرنەت اقتارىپ وتىرسام، «سەنتيابر» كانالىنىڭ كەشكى جاڭالىقتارىندا ءبىر جاس جىگىت ءوزىنىڭ قوعامدىق ۇيىمى اتىنان ومۇربەك تەكەباەۆقا «جىلدىڭ ۇزدىك ادامى» اتتى اتاق ۇسىنىپ، سۇحبات بەرىپ تۇر. جاس جىگىت سۇحباتىندا «ءبىز ءوز تۇلعالارىمىزدىڭ قادىر-بارقىن كوزىنىڭ تىرىسىندە باعالاي ءبىلۋىمىز كەرەك. مىنە، ءبىزدىڭ شىعان ساياساتشىمىز ومۇربەك چەركەشەۆيچتى قازاق تۋعاندار باعالاپ، كەرەمەت ىر ساپتارىن جازىپتى...» دەپ جاتىر. تەلەارنا ەفيرىندە ءوتىپ جاتقان «ادىلەت جاستار قوزعالىسىنىڭ توراعاسى تۋرسۋنبەك بەيشەنبەكوۆ» دەگەن جازۋدى قايتا وتكىزىپ، جاس جىگىتتىڭ اتى-ءجونىن جازىپ الدىم.

سويسەم، تۋرسۋنبەك بەيشەنبەكوۆ مەنىڭ ولەڭىمدى «Abai.kz-تەن» كوشىرىپ الىپ، ءوزى باسقاراتىن «شىندىق» اقپارات سايتىنا باياعىدا سالىپ قويعان ەكەن.
قازىر اتى-ءجونىن بىلسەڭ، كىم بولسا دا ول ادامدى تابۋ ونشا قيىن ەمەس قوي.  ارى قاراي تۋرسۋنبەك بەيشەنبەكوۆتى «Facebook» الەۋمەتتىك جەلىسىنەن تاۋىپ الىپ، «مەسسەندجەر» ارقىلى تىلدەسە باستادىم. ودان ارعى جەردە تەلەفون ارقىلى سويلەسىپ، بارا-بارا ءتىپتى جاقىنداسىپ كەتتىك.
كەلەسى جىلى قازاقستاندا «ەكسپو-2017» كورمەسى ءوتتى. مەن تۋرسۋنبەك باۋىرىمدى استاناعا سول كورمەگە شاقىردىم. ءسويتىپ، 2017 جىلدىڭ جازىندا تۋرسۋنبەك بەيشەنبەكۇلى استاناعا كەلدى. ءبىر جىلدان بەرى تەلەفون ارقىلى سويلەسىپ جۇرگەن باۋىرىممەن بەتپە-بەت كەزدەسىپ، اڭگىمەنىڭ كورىگىن ءاي كەپ ءبىر قىزدىردىق-اۋ، شىركىن. وتباسىمىزبەن بارىپ، «ەكسپو» كورمەسىن ءبىر كۇن بويى ارالادىق. ەلوردانىڭ كورىكتى جەرلەرى مەن مۇزەيلەرىن كورسەتتىم. ءبىر وكىنىشتىسى، تۋرسۋنبەكتى بايتەرەككە شىعارا المادىم. ەكى-ءۇش رەت بارىپ، ادامنىڭ كوپتىگىنەن كەزەك تيمەدى...

وسى ساپارىندا باۋىرىم جازۋشى، جۋرناليست داۋرەن قۋات اعاسىمەن كەزدەسىپ، تاعى ءبىر جىرعاپ قالدى.

25-تەن ەندى عانا اسقان جاس جىگىت قىرعىز رەسپۋبليكاسىنىڭ اۋمالى-توكپەلى تاريحىنان، تاۋەلسىزدىك جىلدارى باسىپ وتكەن سوقتىقپالى سوقپاقسىز جولىنان تولىق حاباردار ەكەن. حاباردار ەكەن دەگەن جاي ءسوز، ءوزىنىڭ ازاماتتىق كورقاراسى مەن ۇستانىمى بار ەكەنىن كورسەتىپ، داۋرەن ەكەۋمىزدى قاتتى قۋانتتى. وتانىنا دەگەن ىستىق ماحاببات، ادىلەتتىلىككە دەگەن قۇشتارلىق جاس جىگىتتىڭ جانارىندا وت بولىپ لاۋلاپ تۇردى.

ءبىر اپتادان سوڭ مەن كەزەكتى ەڭبەك دەمالىسىمدى الىپ، قوناعىمدى ءوزىمىزدىڭ الاكولگە ەرتىپ كەتتىم. استانادا بىتپەي قالعان اڭگىمەمىز ەندى پويىزدا جالعاستى.

تۋرسۋنبەك ءبىزدىڭ الاكولدى كورىپ، ءوزىنىڭ ىستىقكولىمەن سالىستىرىپ، كەرەمەت باي مەملەكەتتەگى وسىندا كەرەمەت كولدىڭ جاعاسىنداعى ينفراقۇرىلىم مەن قوناقتاردى قابىلدايتىن فانسيوناتتاردىڭ جۇتاڭدىعىنا قاراپ، باسىن شايقاپ-شايقاپ قويادى. ءبىزدىڭ كوڭىلىمىزگە كەلمەسىن دەي مە ەكەن، ارتىنان ەلوردامىزدى ەسكە الىپ، جاتىپ كەپ تاڭىرقايدى...

بۇل – المازبەك اتامباەۆتىڭ التى جىلدىق پرەزيدەنتىك مەرزىمى اياقتاۋعا جاقىنداپ، قىرعىز رەسپۋبليكاسىندا پرەزيدەنتتىك سايلاۋدىڭ دايىندىق جۇمىسى باستالىپ، كانديداتتار بەكىتىلگەن كەز بولاتىن.

الاكولدە اپتالاپ جاتىپ، شومىلىپ، ەمىن-ەركىن ءبىر دەمالامىز دەپ كەلگەمىز عوي. جوق، ەرتەسى تۋرسۋنبەگىم «اعا، مەن قايتپاسام بولمايدى ەكەن. بار ءۇمىتىمىز ومۇربەك تەكەباەۆ پەن تەمىر ساريەۆ ەدى، ءوزىڭىز كورىپ تۇرسىز، ومۇربەك چەركەشەۆيچتى اق جەرىنەن سەگىز جىلعا سوتتاپ، تۇرمەگە قامادى. ەندىگى سەنگەنىمىز – تەمير ارگەمباەۆيچ. ينتەرنەتتەن بايقاپ وتىرمىن، تەمير ارگەمباەۆيچتىڭ سايلاۋ كومپانياسى جۇمىسىن باستاپتى. مەن سوعان بارىپ كومەكتەسۋىم كەرەك. رەنجىمەڭىزدەر، ءبىزدىڭ ەلىمىز قازىر قيىن جاعدايدا تۇر...» دەپ، قورجىن-كەشەگىن جيىپ، قايتۋعا بەكىدى.

تۇسكە دەيىن، قازاقستاننان العان اسەرىمەن ءبولىسىپ، سۇحبات بەردى.
ول سۇحباتى «نازارباەۆتىڭ «الدىمەن ەكونوميكا، سوسىن ساياسات» دەگەن ۇستانىمىنىڭ ماڭىزىنا كوزىم انىق جەتتى» - دەگەن تاقىرىپپەن «Abai.kz» اقپاراتتىق پورتالىندا جارىق كوردى.

نە كەرەك، اپتالاپ جاتادى دەگەن تۋرسۋنبەك ءىنىم كەشكى اۆتوبۋسپەن ەلىنە قايتتى. ءبىزدى كەلەسى جىلى ىستىقكولگە دەمالىپ قايتۋعا شاقىرىپ كەتتى.
2018 جىلدىڭ 22 جەلتوقسانىندا ومۇربەك تەكەباەۆ الپىس جاسقا تولدى. اتاعى الاتاۋداي تۇلعانى قىرعىزستاندىقتاردىڭ باسىم كوپ بولىگى «قىرعىزدىڭ ۇلتتىق ليدەرى» دەپ باعاسىن بەرىپ قويعان. قۋعىندىققا ۇشىراي باستاعان ساتتەن باستاپ، ومۇربەك تەكەباەۆ دۇركىن-دۇركىن ءباسپاسوز ءماسليحاتىن وتكىزىپ، پارلامەنت مىنبەسىنەن سويلەپ، باق-قا سۇحباتتار بەرىپ، ءوزىنىڭ كىم ەكەنىن جالپاق الەمگە ادبەن تانىتقان. قامالعاننان كەيىنگى سوتتىڭ بارىسى دا اشىق جۇرگەندىكتەن، ونىڭ اق ەكەنىنە دە ەلدىڭ كوزى ابدەن جەتكەن. تۋرسۋنبەك بەيشەنبەكوۆ باستاعان جاس جۋرناليستتەر ونى قولداپ، كۇن قۇرعاتپاي جازىپ وتىردى. تۋرسۋنبەكتىڭ «شىندىق» اقپاراتتىق پورتالىنىڭ بەتىن اشساڭ بولدى، ومۇربەك تەكەباەۆ تۋرالى ماقالادان اياق الىپ جۇرە المايسىڭ.

ءو.تەكەباەۆ قامالعان سوڭ، بولات شەر باس بولىپ، ونىڭ «اتا مەكەن» پارتياسى ءبىر گازەتتى تۇگەلىمەن وعان ارناپ شىعاردى. مەنىڭ ولەڭىمدى قىرعىز تىلىنە اۋدارىپ، سول گازەتكە باستى. سوڭىنا «وسى ولەڭگە اۋەن شىعارىپ ورىنداعان ادامعا ەلۋ مىڭ سوم سىيلىق بەرىلەدى» دەپ جاريالادى. «اتا مەكەن» پارتياسىنىڭ ارناۋلى گازەتى جوق كورىنەدى، سول دۇنيەلەردى باسىپ، تارتاتۋ ءۇشىن تۋرسۋنبەك بەيشەنبەكۇلى، «اعاما جاساعان كومەگىم بولسىن» دەپ، «شىندىق» باسىلىمىنىڭ گازەتتىك نۇسقاسىن تەگىن بەردى.

اۋەلگى سوزىمىزگە ورالساق، جازدان قالعان ون كۇندىك ەڭبەك دەمالىسىمدى الىپ، ومۇربەك تەكەباەۆتىڭ الپىس جىلدىق مەرەيتويىنا بارۋعا قامدانا باستادىم. بىراق، شاقىرۋشىلارعا «ومۇربەك چەركەشەۆيچ تۇرمەدەن شىقسا، بارام!» دەپ، ەسكەرتتىم. سەبەبى، قىرعىز قاۋىمىندا «مەرەيتوي قارساڭىندا ومۇربەك تەكەباەۆتى بوستاندىققا شىعارادى ەكەن» دەگەن ءسوز شىعا باستاعان. وكىنىشكە وراي، جۇرتتىڭ ول ءۇمىتى كۇڭگىرت تارتا باستادى. توي جاقىنداعاندا مەن «ەگەر، ومۇربەك تەكەباەۆپەن كەزدەسە السام، باراتىنىمدى» ايتتىم. ءۇش-ءتورت كۇن قالعاندا بايلانىسشى جىگىتتەن «21 جەلتوقسان كۇنى ساعات 12:00-دە ءبىر-ەكى ساعاتقا كەزدەسە الاسىز» دەگەن حابار كەلدى.

ىنتىماق ساپيانعازى دوسىمدى ەرتىپ الىپ، بىشكەككە جەتتىم. بەلگىلەنگەن ۋاقىتتا تۋرسۋنبەك ءىنىم ءبىزدى باستاپ بارىپ، ايتۋلى تۇلعامەن قاماقتا وتىرعان جەرىنەن كەزىكتىردى.

شىنى كەرەك، الىستان اتىن ەستىپ، الەۋمەتتىك جەلىلەردەن جالىندى سوزدەرىن ەستىپ جۇرگەن ازاماتتى كورۋ، قولىن الۋ، از-كەم بولسادا سويلەسۋ – مەن ءۇشىن، ارينە، ارمان بولىپ جۇرگەن. قاسىندا ايەلى ايگۇل تەكەباەۆا بار ەكەن. تۇرمەدە وتىردى دەيتىن ەمەس، ومۇربەك تەكەباەۆ سول تەلەارنادان كورگەن قالپىنان تۇك وزگەرمەپتى. قايتا، ودان ارى قايراتى ارتىپ، جىگەرى تاسىپ تۇرعان سەكىلدى كورىندى ماعان. جاسىراتىنى جوق، «سىرت كوز – سىنشى» دەگەن عوي، ورتا ازياداعا «دەموكراتيانىڭ ارالشاسى» اتانعان مەملەكەتتىڭ «مانداتسىز پرەزيدەنتىنەن» قازاقستان تۋرالى نە ايتاتىنىن، قانداي كوزقاراستا ەكەنىن بىلگىم كەلىپ جۇرەتىن. اماندىق-ساۋلىق سۇراسىپ، الپىس جاسىمەن قۇتتىقتاعان سوڭ، تاپ-تار بولمەدە كوفە ىشە وتىرىپ، اڭگىمەگە كىرىستىك. «ەگەر، قىزعىزدىڭ سىزدەن دە چوڭ ءبىر اقىنى ءسىز قۇساپ ماعان ولەڭ جازعاندا تۇك اسەرى بولماس ەدى. تانىمايتىن، الىستاعى ءبىر ەلدىڭ اقىنى جازعانى قاتتى اسەر ەتتى. ءوزىم، وتباسىم، اسىرەسە، انام قاتتى قۋاندى. ەرتەڭ كورەسىز، پارتيالاستارىم ءسىزدى تۇگەل تانىپ كەتتى. بىزدە وتىرىك پەن شىننىڭ، اق پەن قارانىڭ پارقىن اجىراتۋ قالىپ بارادى. مەنىڭ تۇرمەگە قامالعانىم وتە جاقسى بولدى، جۇرت كىمنىڭ كىم ەكەنىن ءبىلىپ جاتىر...» دەپ، ماعان راحمەتىن ايتىپ جاتىر ومۇكەڭ. ايگۇل جەڭگەمىز «وسى دا جەتەر» دەگەندەي، جۇدىرىعىمەن جولداسىنىڭ ارقاسىنان جەڭىل عانا «نۇقىپ» قويادى ەرەكلەپ. ورايى كەلگەندە، ومۇكەڭنەن «ءبىزدىڭ قازاقستان تۋرالى نە ايتاسىز؟» دەپ، سۇرادىم.

– قىرعىزستان كىشكەنە عانا ەل. بىزگە اقش-تىڭ دا قىزىعۋشىلىعى بۇرىنعىداي ەمەس، باسەڭدەدەپ قالدى. رەسەيدىكى دە سولاي. قازىر ءوز قازانىمىزدا ءوزىمىز قايناپ جاتقان ەلمىز. ال، قازاقستان ورتا ازيا عانا ەمەس، الەمدەگى ۇلكەن مەملەكەت. بىراق، حالقى تىم از. ونىڭ ۇستىنە، تۇرعان ورنى دا قاۋىپ پەن قاتەرگە تولى. ەگەر، قازاقتار تاۋەلسىزدىك العاننان بەرى ءبىزدىڭ قىرعىزستاننىڭ جولىمەن بەس پرەزيدەنت اۋىستىرعاندا، ورتا ازيادا قازاقستان جوق بولىپ كەتەر ەدى! – دەدى، ومۇربەك چەركەشەۆيچ.

مۇندايدا ۋاقىت شىركىن، زۋىلداپ وتە شىعادى عوي، جاقسى اڭگىمەنىڭ قىزىعىمەن ەكى ساعات زىر ەتىپ وتە شىقتى.

ومۇركەڭمەن جىلى قوشتاسىپ، 2019 جىلدىڭ 20 قاڭتارىندا وتەتىن ەلۋ جىلدىق تويىما شاقىردىم. «شىقسام، ءسوزسىز بارام!» دەدى، ومۇربەك تەكەباەۆ كوزى وتتاي جانىپ! قوشتاسار ساتتە نۇرتاي ابىقاەۆ اعامىز بەن ەرلان قارين ءىنىمىزدى ەسكە الىپ، سالەم ايتتى.

ەرتەسى، «داسميا» ەتنو-رەستورانىنا قىرعىز ەليتاسى تۇگەل جينالىپ، ومۇربەك تەكەباەۆتىڭ الپىس جىلدىعىن سالتاناتپەن اتاپ ءوتتى. رۋحىڭدى اسقاقتاتىپ، جىگەرىڭدى جانيتىن كەرەمەت توي بولدى. ەكس-پرەزيدەنت روزا وتىنباەۆانىڭ داستارحانىندا وتىرىپ، تويدىڭ ءدامىن تاتتىق.

وكىنىشكە وراي، ومۇربەك چەركەشەۆيچ بوستاندىققا شىعا المادى. ەلۋ جىلدىق تويىما  تۋرسۋنبەك بەيشەنبەكوۆ، دينارا ەربوتاەۆا جانە مۇرات ساۋىرباەۆ كەلدى. تۇرسۋنبەك ومۇكەنىڭ قۇتتىقتاۋىن وقىپ، شاپانىن جاپتى...
وتكەن جىلى جازدا داۋرەن قۋات ەكەۋمىز وتباسىمىزبەن ىلگەرىندى-كەيىندى بارىپ، ىستىقكولدە دەم الىپ قايتتىق. تۋرسۋنبەك كۇتىپ الىپ، كەلىننىڭ قولىنان ءدام تاتىرىپ، شىعارىپ سالىپ وتىردى. ومۇكەڭمەن تاعى كەزدەسىپ، امانداستىق.

وسى كەزدەسۋلەردە ءجۇرىپ، ءبىر بايقاعانىم، تۋرسۋنبەك بەيشەنبەكوۆ ورتاسىنا، اسىرەسە، اعالارىنىڭ الدىندا وتە سىيلى، ابىرويلى ەكەن. قىرعىز ساياساتشىلارى ءبىر تۋرسۋنبەك بەيشەنبەكوۆتى عانا ەمەس، وزىنەن كەيىنگى نامىستى ءىنى-قارىنداستارىن قاتارىنا كوپتەپ تارتىپ، ەرتىپ جۇرەتىنىن كورىپ، قاتتى قىزىقتىم. ەرتىپ قانا جۇرمەي، ولاردى ىقىلاسپەن تىڭداپ، اقىلداسىپ وتىراتىنى ءتىپتى ريزا قىلدى ءبىزدى.

ءسوز تۋرسۋنبەك باۋىرىم تۋرالى بولىپ جاتىر عوي، ول جاس بولعانىمەن ادىلەتتىلىك جولىندا العان بەتىنەن قايتپايتىن ازامات. تالعامى بيىك، ۇستانىمى قاتاڭ جىگىت. كىسىگە سويلەگەن سوزىنە ەمەس، ىستەگەن ىسىنە قاراپ باعا بەرۋدى ومىرلىك ادەتىنە اينالدىرعان. سوندىقتان دا بولار، اناۋ-مىناۋعا شكەسىنەن قارايدى. ال، ءوزى ۇناتقان ادامىنىڭ جولىندا ولۋگە دايىن. العاشقى كەزدەسكەنىمىزدە ونىڭ تىزىمىندە ومۇربەك تەكەباەۆ، تەمير ساريەۆ، اليكبەك جەكشەنكۋلوۆ، سابىر جۋمابەكوۆ جانە گەنارال كۋرسان اسانوۆ قانا بار بولاتىن. ءبىز دە سىرتتاي بايقاپ، باقىلاپ ءجۇرمىز عوي، ايتسا-ايتقانداي، بۇل تۇلعالار قىرعىز ەلىنىڭ شىن مانىندەگى تىرەكتەرى. قازىر تۋرسۋنبەكتىڭ ول تىزىمىنە اداحان مادۋماروۆ، ومۇربەك بابانوۆ، ىرىسكەلدى مومبەكوۆ، داستان جۋمابەكوۆ... كىرگەن كورىنەدى.

تاعدىردىڭ سىناعى بولار، قىرعىز ساياساتىنىڭ ارى مەن ۇياتى بولعان ومۇربەك تەكەباەۆ اتامباەۆ داۋىرىندە سەگىز جىلعا سوتتالىپ، قازىر ۇيقاماقتا وتىر. ءىسى قايتا باستان قارالۋ ۇستىندە.

ۇلتتىق گەنارال اتانعان، قىرعىز اسكەري سالاسىندا زور بەدەلگە يە كۋرسان اسانوۆ اتامباەۆتى ۇستاۋ كەزىندە «قىزمەتىن اسىرا پايدالاندى» دەگەن ايىپپەن جازاعا تارتىلىپ، ءۇي قاماققا الىندى.

ال، قىرعىز ساياساتى مەن جۋرناليستيكاسىنىڭ بولاشاق جارىق جۇلدىزدارىنىڭ بىرەگەيى بولايىن دەپ تۇرعان تۋرسۋنبەك بەيشەنبەكوۆ تا ءبىر-ەكى ايدان بەرى ايىپتالىپ، ءۇي قاماعىندا تەرگەلىپ جاتىر...

بۇل «ءداسۇر» ۇلكەن ساياساتتا جۇرگەن قىرعىز ساياساتشىلارى ءۇشىن باسىپ وتۋگە ءتيىستى ءبىر «بەلەس» بولسا كەرەك دەپ ويلايسىڭ. قاي قوعامدا دا تۇلعاعا جولدىڭ بۇراڭى، تاعدىردىڭ قاتالى كەزدەسىپ وتىرادى ەمەس پە؟! ەڭ باستىسى، ەلدىڭ كوزى دۇرىس، ءسوزى جىلى بولسا، جەڭىس – سول!

ادىلەتسىزدىكتىڭ تەكپىسىن ابدەن تارتقاننان بولسا كەرەك، جالپى قىرعىز تۋعاندار «اق يىلەدى، سىنبايدى!» دەگەن ءسوزدى وتە كوپ ايتادى ەكەن. ءبىز دە سول تىلەكتىڭ ىشىندەمىز، تۋرسۋنبەك!

قىرعىز بەن قازاق ەجەلدەن توسەكتە باسى، توسكەيدە مالى بىرگە بولعان باۋىرلاس حالىق. ەكى ەل دۇنيە دۇربەلەڭگە تولىپ تۇرعان كەزدە تاۋەلسىزدىك الىپ، بىرىنە-ءبىرى ارقا سۇيەپ، بىرىندە جوقتى ەكىنشىسى تۇگەندەپ ءجۇرىپ، وتىز جىلدى ارتقا تاستاپ كەلەدى. توقتوعۇل مەن جامبىلدان، اۋەزوۆ پەن ايتماتوۆتان جالعاسقان ۇلى دوستىقتىڭ التىن ارقاۋى ۇزىلمەي، جالعاسا بەرسە ەكەن دەيمىز.

سەن ۋاقىت پەن ءومىر ايداپ اكەپ قوسقان مەنىڭ قىرعىز باۋىرىمسىڭ!
اعالارىڭ امان بولسا، وسى بەتالىسىڭنان جاڭىلماساڭ، سەن ءالى بيىك-بيىك بەلەستەردى باعىندىراسىڭ!!

وردا بۇزار وتىز جاسىڭ قۇتتى بولسىن!!!

اۋىت مۇقيبەك

Abai.kz