دۇنيەجۇزىلىك ساۋدا ۇيىمىنىڭ جەنەۆاداعى باس ديرەكتورى روبەرتو ازەۆەدو، دسۇ باس كەڭەسىنىڭ توراعاسى، جاڭا زەلانديا ەلشىسى دەۆيد ۋوكەر قازاقستان رەسپۋبليكاسىنىڭ جەنەۆاداعى تۇراقتى وكىلدىگىمەن كەڭەسكەننەن كەيىن مۇشەلەر اراسىندا «بۇرىن كەلىسىلگەن مك12-ءنىڭ 8-11 ماۋسىم ارالىعىندا وتكىزىلۋىن ورىنسىز دەپ سانايمىز» دەگەن جازبا حاتتى تاراتتى.

الدىندا قازاقستان رەسپۋبليكاسىنىڭ ۇكىمەتى COVID-19 كوروناۆيرۋسىنىڭ جاھاندىق تارالۋى اياسىندا جاعدايدىڭ اعىمداعى دامۋىنا جانە دۇنيەجۇزىلىك دەنساۋلىق ساقتاۋ ۇيىمىنىڭ بۇل ۆيرۋستى ىندەت دەپ جاريالاۋىنا بايلانىستى دۇنيەجۇزىلىك ساۋدا ۇيىمىنىڭ مۇشەلەرىنە 12-مينيسترلىك كونفەرەنتسياسىن نۇر-سۇلتان قالاسىندا 8-11 ماۋسىم ارالىعىندا وتكىزۋ تۋرالى شەشىمدى قايتا قاراستىرۋ جونىندە ءوتىنىش بىلدىرگەنىن ەسكە سالامىز.

قازاقستان رەسپۋبليكاسى ءوزىنىڭ وتىنىشىندە اعىمداعى جاعداي مينيسترلىك كونفەرەنتسياعا ءتيىستى دەڭگەيدە دايىندالۋعا مۇمكىندىك بەرمەيتىن، ال ىندەت ءتارتىبىن ساقتاۋ ەلىمىزدىڭ حالقىنىڭ جانە ءىس-شاراعا قاتىسۋشىلاردىڭ دەنساۋلىعىنا قاۋىپ توندىرەتىنىن اتاپ وتكەن.

دسۇ باس ديرەكتورى روبەرتو ازەۆەدو حابارلاعانداي، ءوزى جانە دسۇ باس كەڭەسىنىڭ توراعاسى جاڭا زەلانديا ەلشىسى دەۆيد ۋوكەر جاقىن ارادا ۇيىمنىڭ مۇشە مەملەكەتتەرىمەن، سونىڭ ىشىندە 12-مينيسترلىك كونفەرەنتسياسىن وتكىزۋ كۇنى مەن ورنى تۋرالى ماسەلەلەردى تالقىلاۋ ماقساتىندا باس كەڭەستىڭ ارنايى سەسسياسى شەڭبەرىندە كەڭەس وتكىزۋدى جوسپارلايدى.

Abai.kz