قازاقستاندا كوروناۆيرۋس جۇقتىرۋدىڭ تاعى ەكى جاعدايى تىركەلدى.

«قازىرگى تاڭدا قازاقستاندا 8 ناۋقاس بار. ءبارى وقشاۋلاۋدا»، - دەدى دەنساۋلىق ساقتاۋ ءمينيسترى ەلجان ءبىرتانوۆ «حابار 24» ارناسىنان تىكەلەي ەفيردە.

ءمينيستردىڭ ايتۋىنشا، بۇگىن انىقتالعان ەكى ادامنىڭ ءبىرى وڭتۇستىك كورەيادان كەلگەن ەر كىسى.

«بۇگىنگى تاڭدا قوسىمشا تاعى ەكى ادام تىركەلدى. ءبىرىنشى ناۋقاس - 1959 جىلى تۋعان ايەل ادام. ءبىزدىڭ ينفەكتسيالىق ستاتسيوناردا وقشاۋلاۋدا جاتقان پاتسيەنت. بۇرىن كۇيەۋىندە دياگنوز انىقتالىپ، جاقىن بايلانىستاعى ادام رەتىندە وقشاۋلاۋدا جاتقان. قوسىمشا دياگنوستيكانىڭ ناتيجەسىندە كوروناۆيرۋس ينفەكتسياسى انىقتالدى. ونىڭ وتباسىنداعى جاقىندارىنىڭ ءبارى وقشاۋلاۋدا.

«ال ەكىنشى ناۋقاس كەشە «سەۋل-الماتى» ۇشاعىمەن ەلگە كەلگەن. ۇشاقتا كەلگەن 130 جولاۋشىنىڭ ىشىندە ترانزيتپەن كەتكەنى بار. ءبارى دە 100 پايىز ينفەكتسيالىق اۋرۋحاناعا جانە ستاتسيونارعا جاتقىزىلدى. سونىمەن قالاعا ەشكىم كىرگەن جوق. ىشىندە ءبىر پاتسيەنتتى انىقتادىق»، - دەدى ءبىرتانوۆ.

ايتا كەتەيىك، 14 ناۋرىزداعى ەسەپ بويىنشا قازاقستاندا بارلىعى 6 ادامنان كوروناۆيرۋس انىقتالعان. قاۋىپتى ۆيرۋس بەلگىلەرى انىقتالعان تاعى ءبىر قازاقستاندىق گەرمانيادا.

قر دسم مالىمەتىنشە، الماتىدا قاۋىپتى ۆيرۋس انىقتالعان العاشقى ەكى ادام 1974 جىلى تۋعان ەر ادام مەن 1984 جىلى تۋعان ايەل ادام ەدى. ولار گەرمانيادان كەلگەن. كوروناۆيرۋس جۇقتىرعان العاشقى قازاقستاندىق 9 ناۋرىزدا گەرمانيادان كەلگەن. ەكىنشى ادام 12 ناۋرىزدا كەلگەن.

ال 12 ناۋرىزدا ماسكەۋ ارقىلى ميلاننان نۇر-سۇلتانعا ۇشىپ كەلگەن ايەلدەن دە قاۋىپتى ۆيرۋس انىقتالعان.

كوروناۆيرۋس جۇقتىرعان ءتورتىنشى ادام الماتى تۇرعىنى. 1976 جىلى تۋعان. ول 13 ناۋرىز كۇنى گەرمانيادان ۇشىپ كەلگەن. بەسىنشى ادام - الماتىدا. 1958 جىلى تۋعان ەر ادام. جەكە كاسىپكەر. ول 10 ناۋرىز كۇنى ماسكەۋدەن ۇشىپ كەلگەن. ال التىنشىسى - نۇر-سۇلتاندا. ول ۆارشاۆادان (پولشا) ۇشىپ كەلگەن.

Abai.kz