ارداقتى اعايىن!

ەلباسىمىز نۇرسۇلتان ءابىشۇلى نازارباەۆتىڭ دانا دا كورەگەن ءسوزى قاشاندا ەل رۋحىن سەرپىلتىپ، ەرەكشە قۋات بەرەدى. ارقايسىسىمىزدا سەنىم ۇيالاتادى.

بۇل جولى دا وسىلاي بولدى.تۇڭعىش پرەزيدەنتىمىزدىڭ جۇرەگىنەن شىققان اكەلىك قامقورلىق لەبىزى جان تەبىرەنتتى. حالىق بولىپ ەڭسەرۋ قاجەتتىگى جونىندەگى ۇندەۋىن تولىق قولدايمىز.

«مىڭ ءولىپ، مىڭ تىرىلگەن» حالقىمىزدىڭ تاريح تولقىنىندا تالاي تەپەرىشتى باسىنان وتكەرگەنى اقيقات. ءبارىن ايتپاعان كەزدە، الەمدى دۇرلىكتىرگەن نەبىر جان تۇرشىگەرلىك ەپيدەميا اتاۋلىنىڭ جاڭعىرىعى جان-جاقتان دۇركىن-دۇركىن ەستىلىپ جاتۋشى ەدى. بىراق، تۋراسىن ايتۋ كەرەك، ولاردىڭ قاسىرەت-زاردابى ءوز ەپيتسەنترىنەن كوپ ۇزاي قويعان جوق.

ۇلتىمىز تالاي مارتە سىنعا ءتۇسىپ، اتى جامان اۋرۋلاردى ەڭسەردى. سونداي زاۋالداردان ۇرپاعىن امان الىپ شىعىپ، كەڭ وركەن جايدى. ايتسە دە، عىلىم مەن تەحنيكانىڭ جوعارى قارقىنمەن دامىعان داۋىرىندە ۇشىراسقان كەسەلدىڭ قۇر «ۇشىقتاۋمەن» كەتەر ءتۇرى كورىنبەيدى.سوڭعى جىلدارى جان-جاعىن جايپاپ جۇرەتىن دۇلەي داۋىل سىقىلدى، ارانىن اشقان «پاندەميا» اتاۋى ءجيى ايتىلاتىن بولدى.

«ءتاجدى ۆيرۋس» تاقىرىبى – جەر ءجۇزىن ۇرەي قۇرساۋىندا ۇستاۋدا. قۇر تالقىلاۋ بولسا ءبىر ءسارى، بۇل ىندەتتىڭ جەر بەتىنە جايىلۋ گەوگرافياسى كۇن ساناپ ۇلعايىپ، ونىڭ قۇرىعىنا ىلىككەن قۇرباندار سانى كوبەيمەسە، ازايىپ وتىرعان جوق.

ادامزاتقا بۇرىن-سوڭدى بولماعان اۋىر سالماق ءتۇسىرىپ وتىر.بۇگىندە قاسيەتتى قازاقستانىمىزعا كەلىپ جەتتى.ىرگەسى بەرىك ەلدىڭ قاشاندا ەڭسەسى بيىك بولىپ، ىلگەرى باسادى.

ەلباسى-تۇڭعىش پرەزيدەنتىمىزدىڭ ساليقالى ساياساتىنىڭ ارقاسىندا ەلىمىز الەمدىك قاۋىمداستىقتا ءوز ورنىن ويىپ تۇرىپ الىپ، قابىرعالى مەملەكەتكە اينالدى. سونىڭ ناتيجەسىندە ارانىن اشقان تاجالدى تاس ءتۇيىن قارسى الدىق.
«ەل باسىنا كۇن تۋسا، ەر ەتىگىمەن سۋ كەشەدى».

پرەزيدەنت ق.توقاەۆتىڭ «ءا» دەگەننەن ناقتى ءىس-ارەكەتكە نەگىزدەلگەن تياناقتى جوسپار مەن ەڭسەرۋ جولدارىن ۇسىنعانى ەل ەرەكشە سەنىم بەردى. بارشا قازاقستاندىقتار كەسىرلى كەساپاتقا قارسى ءبىر كىسىدەي جۇمىلىپ، جالپىحالىقتىق سيپاتتاعى كۇرەسكە اينالدىرىپ جىبەردى.

ءبىز كۇندەلىكتى تاجىريبەدەن كورىپ وتىرمىز، قازاقستان رەسپۋبليكاسى ۇلتتىق مۋزەيى پرەزيدەنت جارلىعى جارىق كورگەن كۇننەن باستاپ، ءوز جۇمىسىن جاڭا تۇرپاتقا اۋىستىردى.

جوعارى تەحنولوگيامەن جابدىقتالعان مۋزەي الەۋەتى العاشقى كۇننەن قاشىقتان قىزمەت جاساۋعا تولىق مۇمكىندىك بەردى. ەش كەدەرگىسىز جۇمىس جاساپ تۇر.ەڭبەكاقىدا ىركىلىس جوق. جاقىندا ناۋرىز مەرەكەسى قارساڭىندا بارلىق قىزمەتكەرلەر بەلگىلى ءبىر مولشەردە سىياقىعا يە بولدى.

قازاقتىڭ ارعى-بەرگى تاريحى ۇدايى بىرىگۋدەن تۇرادى. اسىرەسە، قازىرگىدەي ەل باسىنا اۋىرتپالىق تۋعان كەزدە ايرىقشا تۋىسقاندىق سەزىم مەن تەمىردەي بەرىك ءتارتىپ تانىتقان. قانداي قيىندىقتى دا ەڭسەرىپ، اياعىن جوعارى دامۋعا ۇلاستىرعان.

بۇل جولى دا سول ۇردىستەن تابىلارىمىزعا ەش كۇمان جوق.

ارىستانبەك مۇحامەديۇلى

Abai.kz